Miedycynskaja siensacyja. Znojdzieny čałaviek, u jakoha ŭ mačy sintezujecca ałkahol
U 61-hadovaj amierykanki daktary vyjavili ŭnikalny sindrom bražeńnia mačavoha puchira. Z-za hetaj patałohii ŭ arhaniźmie piensijanierki pastajanna vypracoŭvaŭsia ałkahol, jaki vychodziŭ z mačoj, piša časopis Annals of Internal Medicine.
Žycharka Pitsburha, jakaja pakutuje na cyroz, znachodziłasia ŭ liście čakańnia na pierasadku piečani. Takim pacyjentam kateharyčna procipakazany pryjom ałkaholu, adnak lekary padazravali ŭ žančyny ałkaholnuju zaležnaść, bo analizy mačy na ałkahol kožny raz davali stanoŭčy vynik.
Amierykancy davodziłasia dakazvać miedykam, što jana nie ŭžyvaje śpirtnoje da taho času, pakul jany nie praviali detalovaje daśledavańnie i nie vyjavili sapraŭdnuju pryčynu.
Najpierš vučonych naściarožyła toje, što vyniki analizaŭ kryvi na etanoł i mačy — na etyłhlukuranid i etyłsulfat, jakija źjaŭlajucca mietabalitami etanołu, byli admoŭnyja, tady jak vyniki analizaŭ mačy na etanoł byli stanoŭčymi. Akramia taho, u pacyjentki adsutničali prykmiety ałkaholnaj intaksikacyi.
Inšaj vielmi dziŭnaj asablivaściu była prysutnaść u mačy vialikaj kolkaści hlukozy — heta stan nazyvajecca hipierhlukazuryjaj — u spałučeńni sa šmatlikimi droždžami, jakija pačkavalisia. Tyja droždžy byli identyfikavanyja jak Candida glabrata — pryrodnyja anałahi piŭnych droždžaŭ, zvyčajna nie vyjaŭlanyja ŭ takoj kolkaści ŭ arhaniźmie čałavieka. Hetyja vyniki pryviali miedykaŭ da razhadki.
Upieršyniu ŭ historyi sučasnaj miedycyny navukoŭcy sutyknulisia z patałohijaj mačavoha puchira, spravakavanaj draždžavymi hrybami Candida glabrata, jakija, pierapracoŭvajučy cukar, što pastupaje ŭ arhanizm, vyrablajuć etanoł.
Vypadki draždžavoha bražeńnia, abo sindrom aŭtapivavareńnia, — heta redkaje zachvorvańnie, pry jakim etanoł u kolkaściach, dastatkovych dla apjanieńnia, vypracoŭvajecca peŭnymi typami droždžaŭ abo bakteryj u vyniku endahiennaj fiermientacyi ŭ stravavalnaj sistemie. Raniej apisvalisia vypadki draždžavoha bražeńnia ŭ kišačniku, ale vypadak, kali hryby pasialilisia ŭ mačavym puchiry, vyjaŭleny ŭpieršyniu.
Mahčyma, mieła miesca supadzieńnie dvuch faktaraŭ: najaŭnaść hryboŭ u mačavym puchiry i pastajannaja prysutnaść vialikaj kolkaści cukru ŭ arhaniźmie pacyjentki, jakaja doŭhi čas pakutavała na dyjabiet.
«Candida glabrata — heta hrybok, jaki vielmi nahadvaje Saccharomyces cerevisiae, piŭnyja droždžy. My sutyknulisia z unikalnaj situacyjaj, kali droždžy, jakija vypracoŭvajuć etyłavy śpirt, pasialilisia ŭ mačavym puchiry pacyjentki i pryviali da raźvićcia ałkaholnaha cyrozu piečani», — tłumačać u artykule aŭtary daśledavańnia.
