Z partyi Žyrynoŭskaha: čałaviek pabyŭ vice-hubiernataram u Rasii, a ciapier staŭ namieśnikam staršyni abłsavieta ŭ Biełarusi
Jon rodam ź Biełarusi, zrabiŭ karjeru pry Žyrynoŭskim, a paśla viarnuŭsia ŭ Biełaruś. Rasijski hubiernatar, u jakoha jon byŭ namieśnikam, paźniej pracavaŭ na vysokaj pasadzie ŭ samaabvieščanaj Danieckaj Narodnaj Respublicy. Tym časam hieroj našaha materyjału daros u Biełarusi da tych samych pasad, na jakich jon pracavaŭ u Rasijskaj Fiederacyi.
Alaksandr Chrystaforaŭ byŭ pamočnikam Uładzimira Žyrynoŭskaha. I, kali kandydata ad Libieralna-demakratyčnaj partyi Rasii abrali hubiernataram Pskoŭskaj vobłaści Rasii, jon staŭ jaho namieśnikam. Ciapier Chrystaforaŭ — staršynia kamiteta pa pracy, zaniataści i sacyjalnaj abaronie Viciebskaha abłvykankama. Bolš za toje, staŭ namieśnikam staršyni abłasnoha savieta narodnych deputataŭ.
Na niezvyčajnuju historyju źviarnuŭ uvahu viadučy supołki «Usio ab Dubroŭnie» Viktar Buhajoŭ. Jon źmiaściŭ dva zdymki čynoŭnika. Na adnym na pinžaku Chrystaforava rasijski ściažok, na inšaj — dziaržaŭny ściah Biełarusi.
Alaksandr Chrystaforaŭ. Fota vitvesti.by.
«Jak dumajecie, ź jakoj krainy hety čynoŭnik: Biełarusi ci Rasii?» — zadajecca pytańniem Buhajoŭ. Nasamreč abodva adkazy pravilnyja.
Alaksandr Chrystaforaŭ naradziŭsia ŭ 1958 hodzie ŭ Viciebsku. Jon skončyŭ tamtejšy vieterynarny instytut. Doŭhi čas pracavaŭ u sielskaj haspadarcy, byŭ dyrektaram saŭhasa. Ale z 1995 hoda Chrystaforaŭ pierabraŭsia ŭ Rasiju.
Viciebski čynoŭnik raskazaŭ «Našaj Nivie» jak tak atrymałasia, što jon pabyŭ čynoŭnikam u abiedźviuch krainach. «Kaliści daŭno pa šerahu pryčyn ja źjechaŭ u Maskvu, kab dapamahčy svajmu tavaryšu, jaki staŭ deputatam Dziaržaŭnaj Dumy Rasii.
Niejak spravy ŭ mianie tam pajšli, tak i zastaŭsia ŭ Rasii, adpracavaŭ tam čatyrnaccać hadoŭ. Pracavaŭ i ŭ Dziaržaŭnaj Dumie, i ŭ struktury SND za časam Barysa Bierazoŭskaha (źjaŭlaŭsia vykanaŭčym sakratarom SND ŭ 1998—1999). Ja byŭ navat namieśnikam hubiernatara Pskoŭskaj vobłaści, — raskazvaje Alaksandr Chrystaforaŭ. — Kali trapiŭ na hetuju pasadu, to skončyŭ Akademiju kiravańnia pry prezidencie Rasii, vučyŭsia ŭsie piać hadoŭ, a nie dvuchhadavyja kursy, jak u Biełarusi».
Chrystaforaŭ zrabiŭ karjeru praz rasijskuju Libieralna-demakratyčnuju partyju. Heta ŭltranacyjanalistyčnaja palityčnaja siła, jakaja padtrymlivaje ŭładu.
«Dastatkova praciahły pieryjad na hramadskich pačatkach ja pabyŭ pamočnikam Uładzimira Žyrynoŭskaha. Što skazać, pa partyjnym daručeńni hadoŭ piać uznačalvaŭ filiju ŁDPR u Pskoŭskaj vobłaści», — raskazaŭ «Našaj Nivie» Chrystaforaŭ.
Kali namieśnik hałoŭnaha redaktara haziety «Pravda Žirinovskoho» Jaŭhien Michajłaŭ zrabiŭsia hubiernataram Pskoŭskaj vobłaści, Chrystaforaŭ staŭ jahonym namieśnikam. Cikava, što Michajłaŭ z časam piarojdzie z ŁDPR u «Adzinuju Rasiju», a paśla ŭ partyju «Radzima». Z pskoŭskaj pasady jon syšoŭ u 2004 hodzie, pracavaŭ pamočnikam kiraŭnika Administracyi prezidenta Rasii. U 2014-m adpraviŭsia ŭ «Danieckuju narodnuju respubliku», pracavaŭ kiraŭnikom spraŭ savieta ministraŭ hetaha maryjanietkavaha ŭtvareńnia.
Fota informpskov.ru.
A šlach Chrystaforava pajšoŭ u inšym kirunku.
«Ja abiraŭsia deputatam Zakanadaŭčaha schodu Pskoŭskaj vobłaści, byŭ namieśnikam staršyni. A ŭ 2010 hodzie pa siamiejnych abstavinach viarnuŭsia nazad u Biełaruś», — praciahvaje Chrystaforaŭ.
Sam čynoŭnik kaža, što pry viartańni ŭ Biełaruś jon viarnuŭ sabie biełaruskaje hramadzianstva, pry hetym admoviŭsia ad rasijskaha. «Tut ja pačaŭ budavać karjeru nanoŭ. Spačatku staŭ daradcam staršyni Viciebskaha abłvykankama [Alaksandra Kosinca — «NN»], a potym mnie prapanavali kamitet pa pracy i zaniataści nasielnictva. Ja ŭžo ŭ druhi raz abirajusia deputam abłasnoha savieta deputataŭ, i, jak i ŭ Rasii, źjaŭlajusia namieśnikam jaho staršyni».
Chrystaforaŭ chvalicca svaimi dasiahnieńniami na novaj pasadzie. «Za apošnija hady naš kamitet pa acenkach Ministerstva pracy trojčy zajmaŭ druhija miescy, a jašče čatyry razy pieršyja. Dośvied rasijskaj pracy mnie prydaŭsia ŭ Biełarusi, tamu ŭsio tut vydatna atrymlivajecca».
«Heta sapraŭdy ŭnikalna. I sprava navat nie ŭ čynavienstvie, ale i ŭ deputactvie. Tam ja trojčy abiraŭsia deputatam, i ŭ Biełarusi ŭžo dva razy. Adzinaje, što ja tut nie byŭ namieśnikam kiraŭnika vobłaści», — žartuje Chrystaforaŭ.
Ciažka ŭjavić sabie, kab u niejkaj jeŭrapiejskaj dziaržavie pryniali na dziaržaŭnuju słužbu čałavieka, jaki zrabiŭ karjeru ŭ ultranacyjanalistyčnaj rasijskaj partyi, a paśla na dziaržsłužbie ŭ Rasijskaj Fiederacyi.
Biełaruskuju movu Chrystaforaŭ vydatna razumieje, chacia sam razmaŭlaŭ pa-rusku, tolki naprykancy razmovy skazaŭ: «Pośpiechaŭ».
