Viktar Marcinovič pra zarobki biudžetnikaŭ: Ad charošaha žyćcia ŭ pieradvybarny hod «novuju sistemu apłaty» nie ŭvodziać
Viktar Marcinovič na budzma.by piša na złabadzionnuju temu — pra pierachod z 1 studzienia 2020 hoda na novuju sistemu apłaty pracy biudžetnikaŭ
Pačynajecca samaje cikavaje.
Da hetaha momantu svarki pa nafcie i hazie, małočnyja i miasnyja vojny, spabornictvy pa bijatłonie i pakazčyki pa zamiežnych inviestycyjach isnavali niby ŭ asobnym śviecie. Voś jość usio heta i jość narmalny biełarus, nie zmahar, internet čytaje tolki ŭ płanie «Adnakłaśnikaŭ». Sa śvietam i dziaržavaj stasujecca praz svoj partmaniet.
I z hetym partmanietam, niahledziačy na bijatłon, Jeŭrapiejskija hulni i adsutnaść nafty ŭ trubach, usio było — nu tak. Narmalna. Žyć možna. Kryŭdnavata, viadoma, z palakam jakim pra zarobki pahamanić. Ci ź litoŭcam. Ale ž u ich tam — fih jaho viedaje. NATA, talerantnaść i hiei. Moža, im tam hiei dapłačvajuć, chto viedaje. A ŭ nas chaj i mieniej, ale z salutam na Dzień pieramohi i «spasibam dziedu za pabiedu». Usio svajo, radnoje. A hałoŭnaje — na sasiski «Asobyja» chapaje.
Ale cudaŭ u śviecie nie byvaje. To-bok byvaje, ale dakładna nie ŭ śviecie zarobkaŭ biudžetnikam.
Što budzie z atrymanymi ŭ lutym zarobkami, było zrazumieła jašče tady, kali jany anansavali pierachod z 1 studzienia na novuju sistemu naličeńnia. Zamienu «taryfnaj staŭki pieršaha razradu» na «bazavuju staŭku» — što b ni značyli abodva hetyja vyrazy.
Bo, viedajecie, u mianie jość pra heta aniekdot.
U kancy 90-ch ja pracavaŭ na takim pradpryjemstvie, zvałasia «Biełaruskaja dziełavaja hazieta». Pakolki toje pradpryjemstva zajmałasia vytvorčaściu vielmi niezapatrabavanaj u Biełarusi pradukcyi — praŭdy, jaho rekłamadaŭcam dziaržaŭnyja orhany dapamahli zabrać adtul usiu rekłamu.
I hrošaj na pradpryjemstvie nie zastałosia. Hrantaŭ tady jašče nie prydumali, to treba było niešta rabić. I ŭładalnik pradpryjemstva naniaŭ «efiektyŭnaha mieniedžara», hety mieniedžar, darečy, i ciapier trecca siarod šmatlikich biełaruskich «ikśpiertaŭ». My tady dumali, što mieniedžar prydumaje, jak nam pavysić prybytkovaść prodažaŭ praz roźnicu, ale heta było z našaha boku naiŭnym: z «Biełsajuzdruku» ž nas vyniali.
To mieniedžar zrabiŭ prykładna toje ž, što Minpracy.
Uvioŭ «novuju sistemu apłaty». Tam byli niejkija «normy», kaeficyjenty, bazavyja staŭki i «premii z fondu ekanomii». U suchim astatku heta aznačała, što zarobak skaraciŭsia sa 150 dalaraŭ da 30. Ale jość šaniec, što ŭ nastupnym miesiacy vykanaješ «normu», i budzie bolej. Kali my pačali buchcieć, chitravan arhanizavaŭ štodzionnyja «tłumačalnyja razmovy», jakija pieraciakali ŭ «płaniorki» i vielmi zaminali pracavać.
Vy ž razumiejecie: ad charošaha žyćcia ŭ pieradvybarny hod «novuju sistemu apłaty» nie ŭvodziać. Naadvarot, zaraz ich treba pačynać karmić, karmić tłusta, bo chto tyja hałasy nie ličyć?
Nastaŭniki, miedyki, piedahohi.
Čamu tak adbyłosia, zrazumieć vielmi prosta, treba było tolki pilna hladzieć naviny apošnich 6 tydniaŭ.
Vy kali-niebudź dumali, kolki ŭ nas tych «biudžetnikaŭ»? Kolki miljonaŭ dalaraŭ treba, kab dać im «papiccot»?
«Statystyčny štohodnik» paviedamlaje, što tolki nastaŭnikaŭ u 2019-m było ŭ nas 97 tysiač. Vychavacielaŭ u dziciačych sadkach — 56 tysiač. Vykładčykaŭ u VNU — 24 tysiač, daktaroŭ — 55 tysiač. «Siarednich miedyčnych pracaŭnikoŭ» — 126 tysiač.
Razam z čynavienstvam i inšymi katehoryjami nabiarecca pałova miljona.
Kab zapłacić takoj kolkaści hramadzian «papiccot», treba $250 młn u miesiac. Dva miesiacy — i hudbaj, kitajski kredyt u pałovu miljarda — heta tolki na zarobki. A pomnicie jašče pra 2,6 miljona piensijanieraŭ, jakim treba taksama chacia b pa 150 dalaraŭ dać pad vybary ($400 młn u miesiac)? Naftaj my nie handlujem, kalij staić, z małočkaj i miasam pieryjadyčna ŭźnikajuć abłomy — vy ž bačycie, navat «Biełšyna» prypyniłasia.
Narmalny biełarus, nie zmahar, toj, što spaścihaje śviet praz partmaniet, niešta ŭžo pačynaje razumieć.
Ale nie da kanca.
Bo što jon robić?
Jon žalicca ŭ Minpracy.
Telefanuje žurnalistam i dasyłaje im raźlikoviki.
Jon na stadyi admovy.
Ci nazavicie heta sprobaj damahčysia praŭdy ad bajar (potym jašče budzie hrukacca da cara).
Pry hetym cikava pahladzieć, što robić urad: jon rasparadžajecca pravieści «sabrańni ŭ kalektyvach». Prapanuju rabić ich doŭhimi, ź pierachodam u płaniorki. Kab pracavać rabiłasia nievynosna, kab sami prasili nie čapać.
Ja pajšoŭ z «Biełaruskaj dziełavoj haziety» paśla taho, jak 8 miesiacaŭ atrymlivaŭ zarobak u 30 dalaraŭ. Cikava, kudy pojduć miedyki i daktary. Chiba nie na vulicu? A kali na vulicu — dyk ci dojduć da płoščy?
Čytajcie taksama:
Biudžetnikam naličyli zarobki pa novaj sistemie. Što atrymali ludzi i jak reahujuć na źmieny?
