U Nacyjanalnym mastackim muziei adkryłasia pieršaja ŭ krainie vystava suprematysta Łazara Chidekiela. Chto heta taki?
Da 100-hodździa tvorčaha abjadnańnia UNOVIS u Nacyjanalnym mastackim muziei adkryłasia vystava ŭradženca Viciebska Łazara Chidekiela. Heta pieršaja ŭ našaj krainie piersanalnaja vystava mastaka-suprematysta, jaki ŭ svaich rańnich rabotach praduhadaŭ źjaŭleńnie minimał-artu i ŭvajšoŭ u historyju jak pieršy ŭ śviecie suprematyčny architektar, aŭtar pieršaha ekałahičnaha architekturnaha manifiesta, adzin sa stvaralnikaŭ viciebskaha abjadnańnia UNOVIS.
Ekspazicyja prachodzić u ramkach prajekta #UNOVIS100, jaki sumiesna realizujuć Centr biełaruska-jaŭrejskaj kulturnaj spadčyny, Muziej historyi Viciebskaha narodnaha mastackaha vučylišča i kampanija A1. Prajekt realizujecca pad patranatam Nacyjanalnaj kamisii Respubliki Biełaruś pa spravach JUNIESKA.
Łazar Chidekiel (1904-1986) naradziŭsia ŭ Viciebsku, navučaŭsia tam u narodnym mastackim vučyliščy ŭ Marka Šahała, Mścisłava Dabužynskaha, Łazara Lisickaha, Kazimira Maleviča i ŭžo ŭ 15 hadoŭ uvajšoŭ u skład UNOVISa — mastackaha abjadnańnia, dziakujučy jakomu Viciebska staŭ centram suśvietnaha avanhardu. U 16-hadovym uzroście Chidekiel uznačaliŭ mastackuju majsterniu vučylišča i mienavita architektury pryśviaciŭ svajo žyćcio.
Vystava «Nas zrazumiejuć praz 100 hod. Łazar Chidekiel» pradoŭžycca da 15 krasavika 2020 hoda. U arhanizacyi ekspazicyi pryniała ŭdzieł siamja Chidekiela, pieradaŭšy kala sotni aryhinalnych malunkaŭ i dakumientaŭ z asabistaha archiva. Na vystavie možna pabačyć rannija suprematyčnyja kampazicyi, prajekty haradoŭ budučaha: haradoŭ, što lotajuć, horada-sadu, kaśmičnych stancyj i pasieliščaŭ, lehiendarny časopis «AERO» — pieršy architekturny ekałahičny manifiest.