Linkiavičus: Dla biełaruskaha ŭrada AES — heta honar, a dla nas biada
Litva nie maje «vialikich iluzij» adnosna Biełaruskaj AES. Ale kali biełaruski bok zmoža zrabić maksimalna mahčymaje ŭ płanie biaśpieki, to heta dapamoža dyjałohu ź Jeŭrasajuzam. Pra heta kiraŭnik MZS Litvy Linas Linkiavičus zajaviŭ padčas razmovy ź biełaruskimi žurnalistami ŭ Minsku, paviedamlaje Tut.by.
Fota: Nadziei Bužan.
— U nas roznyja punkty hledžańnia [ź biełaruskim bokam na AEC]. U vašaha ŭrada ja čuŭ vykazvańni, što «hety prajekt [AES] — naš honar». Dyk ja adkryta im skazaŭ, što dla vas heta honar, a dla nas — biada. Bolš za toje, kali prybrać palityku, to zastaniecca hieapalityka, a ekanamičnaha abhruntavańnia budaŭnictva stancyi niama, ale heta vaša rašeńnie. Ale my možam pasprabavać zrazumieć, što treba dla taho, kab radykalna palepšyć biaśpieku AES — heta nie tolki karyść dla Litvy, ale i pytańnie biaśpieki dla vašych hramadzian, — zajaviŭ Linkiavičus.
Pa słovach litoŭskaha ministra, adnym z rašeńniaŭ moža być varyjant, kali mižnarodnyja ekśpierty «pryjeduć i vydzielać samyja asnoŭnyja standarty biaśpieki, jakija pavinny być vykanany pierad zapuskam stancyi».
— Naša acenka nakont AES nie źmienicca. Ale treba jašče raz acanić siejśmičnyja ryzyki, reahavańnie na pavodki, vialikija katastrofy i hetak dalej. Na siońniašnich sustrečach [z Rumasam i Makiejem] ja adčuŭ, što jość razumieńnie. Dobra, kali budzie ŭvasoblena ŭ žyćcio, — skazaŭ kiraŭnik MZS Litvy.
Linas Linkiavičus taksama adznačyŭ, što pavyšeńnie biaśpieki AES moža dapamahčy razbłakiroŭcy pieramoŭ pamiž Biełaruśsiu i ES pa pryjarytetach partniorstva. Ale ministr padkreśliŭ: punkt hledžańnia Litvy na BiełAES Jeŭrasajuz padzialaje.
— Kali budzie hatoŭnaść rabić maksimalna mahčymaje ŭ płanie biaśpieki AES, to heta dapamoža i dyjałohu ź ES. U nas jość ahulnaje razumieńnie ź ES i Jeŭrakamisijaj pa hetym pytańni. Jany padtrymlivajuć taki prahmatyčny pohlad na rečy — choć niešta, ale zrabić. Treba abjektyŭna hladzieć: reaktar pabudavany, zastałosia zavieźci paliva — i ŭsio zapracuje. Dla ES heta taksama precedent, jak u budučyni razmaŭlać z krainami, jakija buduć budavać takija abjekty na miažy ź ES, — zajaviŭ Linkiavičus.
