Łukašenka — pra vizit Pampiea ŭ Minsk: Jany ŭbačyli realnuju Biełaruś, a nie tuju, što našy admarozki im malavali
Pra heta kiraŭnik Biełarusi raspavioŭ padčas naviedvańnia Dobruša, piša BiełTA.
«Jany ŭbačyli realnuju Biełaruś. Nie tuju, jakoj našy admarozki vazili pražekty tudy i malavali, a ŭbačyli, što heta narmalnaja kraina. I pravoŭ tut chapaje, i nikomu žyć nie pieraškadžajuć», — skazaŭ Łukašenka.
Alaksandr Łukašenka nahadaŭ, što sustrakaŭsia za apošnija hady z mnohimi pradstaŭnikami ZŠA vysokaha ranhu i roznymi ekśpiertami, palitołahami. Bolš za toje, navat PVT u Biełarusi pačynali stvarać z udziełam amierykancaŭ.
«Ale ŭ Rasii našym złaśliŭcam niaŭciam akunucca ŭ hetuju historyju. Heta značyć, my cicha, spakojna vybudoŭvali našy adnosiny», — akcentavaŭ uvahu biełaruski kiraŭnik.
Jon taksama raspavioŭ historyju, kali ŭ Biełarusi jašče byli drennyja adnosiny z ZŠA, prezident Rasii Uładzimir Pucin naviedvaŭ hetuju krainu. «Tam jamu pastavili ŭ paprok, što z-za jaho hetaja dyktatura isnuje ŭ Biełarusi. I kali paśla hetaha my ź im sustrelisia, jon mnie kaža: słuchaj, nu ja ciabie prašu, ty ź imi jak-niebudź miakčej. Ja kažu: u čym miakčej? — Nie svarysia, ź imi treba naładžvać adnosiny, — raspavioŭ padrabiaznaści taho dyjałohu kiraŭnik dziaržavy. — Słuchajcie, ja heta i rablu. Chto zaraz raschvalavaŭsia tam, kamu my pierajšli darohu?»
Havoračy ab praviedzienaj u Minsku sustrečy z Majkłam Pampiea, Alaksandr Łukašenka padkreśliŭ, što heta byŭ sapraŭdy siabroŭski abmien dumkami:
«My abmierkavali ŭsio, što ja viedaju, što jany viedajuć. Jon mnie kazaŭ adkryta praju svaju palityku. Ja kazaŭ tak, jak ja heta razumieju. Jon razumieje našy prablemy zaraz.
U tym liku jany vielmi dobra viedajuć — navat časam lepiej, čym ja — niekatoryja pytańni va ŭzajemaadnosinach z Rasijaj.
Jon mnie skazaŭ: nie chvalujsia, my Biełarusi dapamožam.
I jaho zajavu, što my (ZŠA) pa kankurentnaj canie naftu pastavim».