Linkiavičus: Samaja vialikaja bolka ŭ našych adnosinach — AES
Fota Nadziei Bužan
BiełAES zastajecca hałoŭnaj prablemnaj kropkaj u dvuchbakovych adnosinach Biełarusi i Litvy. Ale biełaruski bok, jak nichto, zacikaŭleny ŭ maksimalnaj biaśpiecy atamnaj stancyi. Pra heta na sumiesnym bryfinhu z kiraŭnikom MZS Litvy zajaviŭ Uładzimir Makiej, piša Tut.by.
Linas Linkiavičus adznačyŭ, što Litva pa-raniejšamu nastojvaje na tym, kab Biełaruś pryniała płan dziejańniaŭ pa vykanańni klučavych rekamiendacyj mižnarodnych arhanizacyj u halinie biaśpieki AES.
— Jość i roznahałośsi, bolki ŭ našych dvuchbakovych adnosinach. Samaja vialikaja — heta AES. Acenki jaje roznyja z našych bakoŭ. Fakt toje, što ŭžo staić reaktar, zastałosia zavieźci paliva. My ŭsio ž taki nastojvajem na tym — dumaju, što heta ŭ intaresach i Biełarusi, pakolki ad hetaha zaležyć biaśpieka abjekta i hramadzian, — kab vyłučyć asnoŭnyja, klučavyja rekamiendacyi mižnarodnych arhanizacyj u halinie biaśpieki AES, dapamahčy heta mohuć zrabić pradstaŭniki ENSREG (Jeŭrapiejskaja hrupa rehulataraŭ jadziernaj biaśpieki) i pryniać płan dziejańniaŭ pa ich vykanańni. Heta było b vielmi stanoŭčaje raźvićcio spravy, niahledziačy na ŭsie roznahałośsi, — zajaviŭ Linas Linkiavičus.
Delehacyja ENSREG ŭ Biełaruś pryjedzie ŭ sakaviku. I biełaruski bok, pa słovach Makieja, hatovy abmiarkoŭvać usie rekamiendacyi, jakija daść rehulatar.
— Nichto tak nie zacikaŭleny ŭ biaśpiecy hetaj stancyi, jak Biełaruś. Tamu ŭsie rekamiendacyi, jakija buduć vykazanyja našym partnioram [Litvoj] buduć abmierkavanyja, a padčas vizitu jeŭrapiejskaha rehulatara hetyja rekamiendacyi buduć abmierkavanyja z adpaviednymi ekśpiertami, — adznačyŭ Makiej.
Kiraŭnik MZS nie zmoh skazać, kali adbudziecca pusk pieršaha enierhabłoka AES, jaki pryjšłosia pieranieści «z-za roznych pryčyn».
