Maci muzykanta Žyvaleŭskaha: «U mianie niama prablem z ałkaholem. A voś syn pajšoŭ pa narkotykach»
U žniŭni 2019 hoda «Naša Niva» publikavała historyju 37-hadovaha muzykanta Fiodara Žyvaleŭskaha, vakalista pank-rok-hurta «Hołaja manaška». Jon źbiraŭ hrošy na lačeńnie kotki, jakuju byccam vykinuła z akna jaho pjanaja maci. Muzykant narakaŭ, što maci nie daje jamu žyćcia — abražaje jaho i jaho siabroŭku, vyklikaje milicyju.
Tady da maci Fiodara dazvanicca nie ŭdałosia. A ciapier jana sama vyjšła na suviaź, kab raskazać svaju viersiju padziej.
Łarysa adrazu zaŭvažaje: z kotkaj tady zdaryŭsia niaščasny vypadak.
«Ja ŭ toj viečar padpracoŭvała ŭ kafe na karparatyvie. Viarnułasia dadomu, było leta, śpiakotna. Mahčyma, ja nie zakryła dźviery ŭ spalniu, a ŭ mianie ž adčyniena akno. Kotka enierhičnaja, napeŭna, jana i vyskačyła. Paviercie, ja nie zrabiła hetaha śpiecyjalna! Ja navat svajoj kartkaj apłaciła pieršy pryjom u vieterynara», — apisvaje padziei žančyna.
Jana kaža, što kanflikty ŭ ich siamji ciahnucca ŭžo na praciahu mnohich hadoŭ. Žyvuć jany z synam razam, bo častka kvatery, jakaja zastałasia ad byłoha muža, pryvatyzavana joj, a častka naležyć Fiodaru.
«Fiodar — čałaviek talenavity. Ale ŭ jaho vialikija prablemy. Ja była pazbaŭlena mahčymaści ŭdzielničać u jaho žyćci, pakolki baćka ŭ 16 hadoŭ jaho adsudziŭ, atrymaŭ apieku. Daŭ jamu asobny pakoj u kvatery, jaki zamykajecca na kluč. Chłopčyk pajšoŭ pa padvarotniach, narkotykach, maje piać sudzimaściaŭ i try adsiedki. Ja nie mahła na jaho ŭździejničać.
Fiodar aficyjna pracavaŭ za ŭvieś čas tolki dva hady, nakolki mnie viadoma. Žyvie na ŭtrymańni svajoj dziaŭčyny, niešta ad mianie pierapadaje».
Pa słovach žančyny, na jaje akazvaŭsia surjozny presinh. Adnojčy syn navat źbiŭ jaje — piensijanierka trapiła ŭ balnicu z prabitym čerapam. Jana na im taksama zryvałasia.
«Razumiejcie, ja była ŭ stresavaj situacyi. Była daviedziena da takaho stanu, što vymušana była reahavać. I navat źjazdžała na dva hady pažyć da brata, bo tut było niemahčyma. Ale ja štrafy spłaciła, usio ŭśviadomiła, spakojna pracuju i nikoha nie čapaju».
Prablem z ałkaholem, adznačaje Łarysa, u jaje niama.
«Ja absalutna narmalny čałaviek. Ciapier pracuju ŭ piedahoham-arhanizataram va ŭniviersitecie. Kali b u mianie byli prablemy z ałkaholem, ja b nie chadziła kožny dzień na pracu. U mianie niama ni balničnych, ni prahułaŭ. Navat kali i byli jakija pytańni, ja ŭsie ich vyrašyła».
