Kazus na «Pieśni hoda»: biełaruskuju śpiavačku abvinavacili ŭ płahijacie sukienki
«Pieśnia hoda Biełarusi» mahła b prajści niezaŭvažna, kali b nie hety kazus. Śpiavačku Uładu abvinavacili ŭ płahijacie. Nie pieśni — sukienki, u jakoj jana vystupała na cyrymonii.
Dyzajnierki siostry Parfianovič ubačyli ŭ joj drennuju kopiju svajho ŭboru.
Śpiavačka Ułada ŭ toj samaj sukiency.
A heta dyzajnierskaja viersija.
«U našym žyćci heta nie pieršaja situacyja, kali našy rečy niaŭmieła kapirujuć, ale my nie prymali miery. Na žal, śpiavačcy Uładzie nie pašancavała, naša ciarpieńnie skončyłasia, — napisała hnieŭny post Maryna Parfianovič. —
Pavažanyja zorki biełaruskaj estrady, nie ekanomcie hrošy, kab nie atrymałasia voś tak! A kali vy vyrašyli vyjści ŭ kopii, to niachaj jana budzie lepšaj za aryhinał. Pakolki mnie asabista soramna ad adnoj dumki, čto niechta vyrašyć, što sukienku dla śpiavački šyli my — zanadta drenna jana siadzić i vyhladaje.
Pavažanaja Ułada, spadziajusia, što hetu sukienku na vas ja bolš nikoli nie ŭbaču ŭ internet-krynicach i na telebačańni. Dla nas heta strašnaja antyrekłama!»
«Naša Nina» patelefanavała artystcy, kab spytać, jak tak atrymałasia.
«Ja ź siostrami Parfianovič asabista nie znajomaja, i ź ich tvorčaściu taksama. Viasnoj na mianie vyjšła kraŭčycha — jana navat nie z našaj krainy — i skazała, što chacieła b sa mnoj pasupracoŭničać. A ja na toj momant rychtavałasia da «Pieśni hoda». Pakolki była vielmi zaniataja hastrolami, skinuła joj svaju pieśniu i paprasiła: prapanujcie mnie vobraz. Jana vysłała eskiz — heta była biruzovaja sukienka ź pierjem paŭlina. Ja pahladzieła, što mnie pasuje, i dała admašku: šyjcie», — raskazvaje śpiavačka Ułada pra hetu sukienku.
Artystka ličyć, što jana nie paŭtaraje adzin u adzin ubor Parfianovič.
«Kali zabić u internecie «sukienka ź pierjem paŭlina», vydaść kuču varyjantaŭ z kitajskich i amierykanskich sajtaŭ. Toje, što prazrysty niz, dyk heta ŭ mnohich sukienkach. I koler u ich inšy, ciamniejšy».
Śpiavačka kaža, što naŭrad ci budzie nadziavać ubor jašče raz — jon stvaraŭsia admysłova dla «Pieśni hoda».
«Jak toj kazaŭ, vopyt vučyć baluča, tłumačyć dachodliva. Dla mianie heta budzie ŭrok supracoŭničać nie z kraŭčychaj, a z dyzajnierami, jak ja i rabiła raniej.
Reahavać i apraŭdvacca na pasty ŭ sacsietkach ja nie liču patrebnym, u mianie jość čym zajmacca. Da taho ž ja liču, što čałaviek, jaki ni ŭ čym nie vinny, nie musić apraŭdvacca».