«Babrujski kurjer» abaviazali vypłacić maralnuju kampiensacyju sakratarcy vybarčaj kamisii
U Babrujsku 16 studzienia praciahvalisia sudovyja słuchańni pa zysku sakratarki Babrujskaj učastkovaj vybarčaj kamisii № 22 Julii Furman da vydańnia «Babrujski kurjer». Siońnia — vyniesienaje rašeńnie. I jano nie na karyść internet-vydańnia, paviedamlaje spring96.org.
Julija Furman śćviardžała, što hazieta schłusiła pra toje, što adbyvałasia ŭ adzin ź dzion daterminovaha hałasavańnia na vybarčym učastku № 22 Babrujska.
15 listapada na sajcie «Babrujskaha kurjera» źjaviŭsia materyjał «Sakratar učastkovaj vybarčaj kamisii začyniłasia ad naziralnikaŭ sa skryniaj dla hałasavańnia ŭ svaim kabiniecie». Padziei, jakija apisvalisia ŭ materyjale, adbyvalisia napiaredadni, 14 listapada. Pra ich žurnalistam paviedamiła naziralnica Ała Špakava.
Julija Furman, pra jakuju išła havorka ŭ materyjale, nakiravała na adras «Babrujskaha kurjera» zvarot, u jakim ukazała, što «materyjał nie adpaviadaje rečaisnaści». Sakratarka kamisii patrabavała ŭ svaim zvarocie, kab «Babrujski kurjer» apublikavaŭ abviaržeńnie materyjału albo pradstaviŭ dokazy «ŭsiaho taho, što apisana ŭ artykule» i zapatrabavała sabie 5000 rubloŭ za maralnuju škodu.
Sudździa Taćciana Karalenka vyniesła nastupnaje rašeńnie: Vital Sanacienka (na jaho aformleny sajt) i Jaŭhien Hłaholeŭ-Vaśkovič (aŭtar) musiać pakryć dziaržpošlinu ŭ pamiery 153 rubloŭ i maralnuju škodu Julii Furman ŭ 500 rubloŭ (jana prasiła 5 000 rubloŭ). A taksama ŭ siamidzionny termin apublikavać častkovaje abviaržeńnie vyšejzhadanaha materyjału.