Siamiejnaje hniazdo Čyža. Chto žyvie ŭ elitnym pasiołku Łahožask FOTA
Dniami sud Łahojskaha rajona pačaŭ razhlad pazovu «Trajpła» da byłoha top-mieniedžara kampanii Mikałaja Čukisava i jaho byłoj žonki Iny Čukisavaj. Sutnaść pazovu ŭ tym, što kampanija, asnoŭnym ułaśnikam jakoj źjaŭlajecca Juryj Čyž, sprabuje dakazać fakt niaznačnaści ŭhody pa prodažy doma pamiž byłymi mužam i žonkaj. Dom, jaki fihuruje ŭ pazovie, raźmieščany ŭ zakrytym elitnym pasiołku Łahožask. U sudzie było ahučana niamała cikavych detalaŭ ab tym, jak pradavałasia žyllo ŭ Łahožasku i jak naohuł tam usio arhanizavana. Tut.by pahladzieŭ, što saboj ujaŭlaje hety zakryty pasiołak i chto tam žyvie.
Fota: Darja Burakina, tut.by.
Łahožask raźmieščany za 27 kiłamietraŭ ad MKAD u Łahojskim kirunku. Jašče da budaŭnictva elitnaha pasiołka Juryj Čyž ukłaŭsia ŭ stvareńnie harnałyžnaha kompleksu «Łahojsk», a ŭžo paśla hetaha pačaŭ stvarać jarkija taŭnchaŭsy i katedžy ŭ styli šale.
Pieršapačatkova płanavałasia pradavać šale pa 420 tysiač dalaraŭ, a taŭnchaŭsy, jakija słužać idealnym achoŭnym ekranam ad šumnaj trasy, — pa 200. Adnak paźniej cana na ich źniziłasia: u 2017 hodzie katedž na 400 kvadratnych mietraŭ možna było kupić za 200 tysiač dalaraŭ (kvadratny mietr — 500 dalaraŭ), taŭnchaŭs — ad 80 (biez unutranaha azdableńnia) da 170 tysiač dalaraŭ (całkam uładkavany).
Fota: Darja Burakina, tut.by.
Łahožask miascovyja žychary prazvali «pasiołkam Čyža» pa pryncypie inšych abjektaŭ, da jakich prykłaŭ ruku biznesmien. Adnak tut spracavaŭ nie tolki hety pryncyp: u siamji biznesmiena ŭ Łahožasku try damy — ličy, radavoje hniazdo.
Napeŭna tamu pasiołak maje zakrytuju terytoryju, i trapić tudy adkryta nie ŭdasca. Tut usiaho dźvie vulicy - Centralnaja i Aziornaja. Usie damy siamji biznesmiena raźmieščany pobač na Aziornaj. Darečy, minski dom siamji Čyža taksama raźmieščany na «vodnaj vulicy» — Račnoj.
Va ŭłasnaści ŭ biznesmiena tolki adzin dom, pa adnym — u jaho žonki i dački Taćciany. Pryčym ŭčastak u 25 sotak, dzie staić dom Taćciany, u arendzie, termin jakoj skančajecca ŭ 2021 hodzie.
Dom Iny Čukisavaj, jaki fihuruje ŭ sudzie, znachodzicca na adnoj vulicy z damami siamji Juryja Čyža. Tamu niadziŭna, što siamji Čukisavych mahli pieraškadžać sabaki biznesmiena, z-za parušeńnia ŭtrymańnia jakich Mikałaju Čukisavu, jak jon śćviardžaŭ u sudzie, davodziłasia vyklikać milicyju.
Dom ź dziciačaj placoŭkaj naležyć Inie Čukisavaj. Fota: Darja Burakina, tut.by.
U susiedziach u biznesoŭca i mitrapalit Fiłaret (śvieckaje imia — Kirył Vachramiejeŭ), jakomu viasnoj 2012 hoda «Trajpł» pradaŭ zakansiervavany abjekt budaŭnictva, jaki staŭ potym damovaj kaplicaj ŭ honar ikony Božaj Maci Ivierskaj. Praŭda, ciapier u Łahožasku mitrapalitu ničoha aficyjna nie naležyć: ŭ 2016 hodzie pravaŭładalnikam učastka, na jakim raźmieščana kaplica, staŭ Spasa-Jeŭfrasińnieŭski staŭrapihijalny žanočy manastyr u Połacku. Charakterna, što ŭčastak nasuprać kaplicy taksama naležyć Biełaruskaj pravasłaŭnaj carkvie. Tut možna mierkavać, što ŭ mitrapalita było dva ŭčastki — pad žyllo i kaplicu, jakija jon pieradaŭ carkvie.
Fota: Darja Burakina, tut.by.
Jość nieruchomaść u Łahožasku i ŭ staršyni praŭleńnia «Pryjorbanka» Siarhieja Kaściučenki. Jaho dom raźmieščany prosta nasuprać šale Juryja Čyža. Krychu dalej — dom, jaki naležyć partnioru mižnarodnaj kampanii Andreju Aloškinu, jaki śpiecyjalizujecca na kamiercyjnaj nieruchomaści. U susiedziach ŭ jaho IT-biznesmen i vienčurny inviestar Juryj Mielničak. Darečy, u siamji Juryja ŭ Łahožasku dva damy, adzin ź ich jon sprabuje pradać za 200 tysiač dalaraŭ.
Nie abyšłosia ŭ elitnym pasiołku i biez spartsmienaŭ: na Aziornaj raźmieščany asabniak viadomaha futbalista Maksima Žaŭnierčyka. Jość u Łahožasku dom i ŭ Viktara Kułujeva. Jak minimum u 2013 hodzie jon zajmaŭ pasadu staršyni savieta dyrektaraŭ ZAT «Handlovy dom« BiełAZ». Adnosna niadaŭna dom u pasiołku ŭ ipateku kupiŭ Andrej Hulevič — namieśnik hiendyrektara kampanii «Siervaluks», jakaja zajmajecca vytvorčaściu pradukcyi z kurycy pad brendam «Piatrucha».
