U Minsku buchhałtar skrała ŭ pracadaŭcy 140 tysiač dalaraŭ i źjechała ŭ Majami
U sud pieradali kryminalnuju spravu ŭ dačynieńni da 37-hadovaj minčanki, jakuju abvinavačvajuć u kradziažy ŭ asabliva bujnym pamiery šlacham złoŭžyvańnia słužbovymi paŭnamoctvami, paviedamlaje Minsk-Naviny.
Hramadzianka jak indyvidualny pradprymalnik akazvała buchhałtarskija pasłuhi. Siarod pastajannych klijentaŭ byli try firmy.
Va ŭsich kampanij byŭ adzin uładalnik. Kiraŭnik znajšoŭ hetaha buchhałtara ŭ 2015 hodzie pa abjavie ŭ internecie.
Jaje pracu nichto nie kantralavaŭ, bo paprostu nie raźbiralisia ŭ hetaj śfiery. Adnojčy mieniedžary padniali tryvohu — źjavilisia novyja zapazyčanaści pierad pastaŭščykami syraviny. Tady pracadaŭca pacikaviŭsia ŭ buchhałtara, u čym pryčyna takoha nizkaha prybytku. Taja vykruciłasia, skazaŭšy, što vytvorčaje pradpryjemstva stratnaje i pahłynaje ŭsie zaroblenyja hrošy. Akazałasia, takim sposabam złamyśnica sprabavała zamieści ślady.
Vykryć złamyśnicu dapamahła kaleha — śpiecyjalist pa źniešnieekanamičnaj dziejnaści. Zapadozryŭšy niadobraje, razam z kiraŭnikom jana prahledzieła infarmacyju na kampjutary buchhałtara i vyjaviła, što taja pieraličyła sabie na rachunak bolš za 283 tysiačy rubloŭ, jakija naležali kampanijam.
Kali buchhałtar u čarhovy raz pryjšła na pracu, jaje vyklikaŭ kiraŭnik i vystaviŭ pretenziju. Taja była ašałomlenaja i zmahła tolki pramiamlić, što joj vielmi soramna. Zatym jana chacieła pajści, ale joj pryhrazili vyklikam milicyi i zapatrabavali viarnuć skradzienyja hrošy. Adnak ich jana ŭžo paśpieła patracić. Kab paźbiehnuć pakarańnia, žančyna napisała raśpisku, što na praciahu 10 dzion abaviazvajecca viarnuć vykradzienuju sumu, a taksama paabiacała pieraaformić na kiraŭnika svoj dom, jaki znachodzicca ŭ ahraharadku Ždanovičy.
Na nastupny dzień abvinavačanaja pavinna była sustrecca z kiraŭnikom u BRTI, kab pieraaformić katedž. Adnak, pa jaje słovach, dakumienty na nieruchomaść vypadkova źvioz sužyciel, i ŭ jaje pry sabie jość tolki pašpart. Tady mužčyna zapatrabavaŭ nataryjalna aformić daŭhavyja abaviazacielstvy. Buchhałtar pahadziłasia. Adnak pakul toj apłačvaŭ dziaržpošlinu, jana źnikła. Na telefonnyja zvanki z taho momantu jana adkazvać pierastała.
Paźniej vyśvietliłasia, što złamyśnica, śpiešna pradaŭšy svoj katedž, razam ź dziećmi palacieła ŭ Majami, dzie pražyvała jaje maci. Sužyciel abvinavačanaj pra heta navat nie zdahadvaŭsia, a kali daviedaŭsia, ź niervovym zryvam apynuŭsia ŭ balnicy.
Hramadzianku abviaścili ŭ mižnarodny vyšuk. U listapadzie 2019-ha jaje departavali z ZŠA ŭ Minsk.
Abvinavačanaja svaju vinu nie pryznaje. Joj pahražaje pakarańnie ŭ vyhladzie pazbaŭleńnia voli na termin ad 5 da 12 hadoŭ sa štrafam i z pazbaŭleńniem prava zajmać peŭnyja pasady abo zajmacca peŭnaj dziejnaściu.
