Praciŭniki prezidenta samaabvieščanaj Abchazii zavałodali cełym arsienałam zbroi
U Suchumi pradstaŭniki apazicyi zachapili budynak administracyi prezidenta samaabvieščanaj Abchazii, vyjavili pakoj sa zbrojaj słužby achovy i zavałodali zbrojaj. Pra heta paviedamlaje Radyjo Svaboda. Pradstaŭnik Rady biaśpieki respubliki zajaviŭ, što prymianieńnie siły da pratestoŭcaŭ pakul nie płanujecca, ale nie vyklučajecca ŭ budučyni.
Uviečary 9 studzienia parłamient Abchazii pryniaŭ pastanovu z zaklikam da prezidenta padać u adstaŭku ŭ suviazi sa składanym hramadska-palityčnym stanoviščam. Udzielniki apazicyjnaha mitynhu zachapili budynak administracyi prezidenta. Jany zapatrabavali admieny vynikaŭ prezidenckich vybaraŭ, jakija prajšli ŭ vieraśni. Na ich ź pieravahaj u paŭtara pracenta hałasoŭ pieramoh Chadžymba.
Dzieviać apazicyjnych partyj zapatrabavali pryznać vyniki hałasavańnia niezakonnymi i padali pazoŭ u sud. Ale tam razhladać zajavu nie stali. Apazicyja padała skarhu. Novaje pasiadžeńnie płanavałasia 9 studzienia, ale jaho pieranieśli na niavyznačany termin.
Chadžymba zajaviŭ, što admaŭlajecca pakidać svaju pasadu i zaklikaŭ apazicyju da pieramovaŭ dla zachavańnia stabilnaści ŭ respublicy. Pra adkaz apazicyjanieraŭ pakul nie paviedamlajecca.
