Były deputat i pasoł Sadoŭski źvierniecca da Niamieččyny ŭ suviazi ź pieraśledam
Były deputat Viarchoŭnaha Savietu i člen Prezydyjumu VS, pieršy ambasadar Biełarusi ŭ Niamieččynie Piotra Sadoŭski raspaŭsiudziŭ zajavu na zaklučnym pasiadžeńni suda pa jahonaj spravie za ŭdzieł u akcyjach suprać «pahłyblenaj intehracyi» z Rasiejaj, piša Radyjo Svaboda.
Administracyjnaja sprava razhladałasia 30 śniežnia 2019 u sudzie Centralnaha rajonu Miensku. Jaho sudziać pavodle artykułu 23.34 KaAP za vystupy na mitynhach 7—8 śniežnia z prystupak Pałacu Respubliki na Kastryčnickaj płoščy. Kali vyśvietliłasia, što na dałučanym da milicejskaha pratakołu fotazdymku inšy čałaviek, pasiedžańnie sudu było pieraniesiena na 9 studzienia.
Piotra Sadoŭski źviartaje ŭvahu, što «sudovy praces adbyvaŭsia va ŭmovach mocnaha cisku dziaržaŭnych ŚMI, jakija tyražavali kanstatacyju Alaksandra Łukašenki ŭ interviju z karespandentam rasiejskaha kanała «Echo Moskvy» 24.12.2019 h., u jakim (jašče da vynikaŭ sudovaha śledztva!) zajaŭlałasia, što ŭdzielnikami niedazvolenaha mitynhu byli «niabiednyja» hramadzianie, prykormlenyja nieviadomymi siłami, zacikaŭlenymi ŭ destabilizacyi stanovišča ŭ krainie».
Sadoŭski śćviardžaje, što sudździ Ivan Kaścian i Julija Hustyr «pačali pakryvać iłžeśviedčańni, jakija ŭtrymlivajucca ŭ pratakołach», i abviarhaje pakazańni supracoŭnikaŭ milicyi:
«Hr. Sadoŭski P. V. nia biehaŭ pa płoščy sa ściaham, nie kryčaŭ lozunhi. Jon praciahvaŭ spravu svajho žyćcia: vitaŭ dziaržaŭnuju niezaležnaść 7-ha śniežnia 2019 h. śpievami patryjatyčnaj pieśni na słovy Janki Kupały «A ŭ bary-bary try darožańki», jakuju jon śpiavaŭ, budučy deputatam VS, na płoščy Niezaležnaści 25 žniŭnia 1991 hodu. U toj dzień Deklaracyi ab niezaležnaści byŭ nadadzieny status Kanstytucyjnaha zakonu».
Adnosna abvinavačvańnia za ŭdzieł u druhoj akcyi, Sadoŭski adznačaje, što 8-ha śniežnia jon «taksama nia biehaŭ pa płoščy sa ściaham i ničoha nie kryčaŭ. Jon vystupiŭ z karotkaj pramovaj.
Z ulikam taho, što ciapier pierad pahrozaj tak zvanaj pahłyblenaj intehracyi faktar nacyjanalnaj movy stanovicca vyraznym palityčnym čyńnikam, jon prapanoŭvaŭ pačać kampaniju pryciahnieńnia prezydenta Łukašenki da adkaznaści za raspalvańnie hramadzianskaj varožaści na karyść «ruskaha miru» praz užyvańnie ŭ svaim rasiejskim maŭleńni biełaruskich frahmentaŭ z admoŭnaj kanatacyjaj: ździeklivaja intanacyja, pierakryŭleny tvar, hiper-imitacyja typovych biełaruskich zyčnych hukaŭ, pierakručvańnie sensu asobnych «pazytyŭnych» słoŭ na złačynna-procilehły («śviadomyja»), aznačeńnie biełaruskaj movy jak defektyŭnaj i niepaŭnacennaj («Pišytie na normalnom jazykie»).
Da taho ž heta — ździek z rodnaj movy svajoj maci. Heta paćvierdzić lubaja linhvistyčnaja ekspertyza», — pierakanany Piotra Sadoŭski.
U svajoj zajavie były deputat Viarchoŭnaha Savietu 12-ha sklikańnia, čalec Prezydyjumu Viarchoŭnaha Savietu, staršynia parlamenckaj Kamisii pa mižnarodnych spravach i źniešnieekanamičnych suviaziach kanstatuje:
«Vykładzienyja fakty prymušajuć padsudnaha, jak pieršaha ambasadara RB u FRH, niezaležna ad miery pakarańnia źviarnucca da niamieckaha boku z prośbaj pry składańni dalejšych planaŭ supracoŭnictva ź biełaruskim bokam u sfery dziejnaści pravaachoŭnych orhanaŭ, praktyki pravaprymianieńnia i sudovych dačynieńniaŭ uličvać ahučanyja fakty. Pačynajučy z 90-ch hadoŭ minułaha stahodździa Hiermanija akazvała vialikuju dapamohu Biełarusi ŭ miežach prahramy TACIS i ŭ jurydyčnaj sfery».
Taksama Piatro Sadoŭski papiaredžvaje, što «maładym sudździam varta dumać pra svaju asabistuju reputacyju jak členam pavažanaha supolnictva svaich eŭrapiejskich kalehaŭ. Jašče z pačatku 60-ch hadoŭ minułaha stahodździa ŭ składzie SSSR Biełaruś, jak člen AAN, stała členam šmatlikich mižnarodnych arhanizacyj, jakija zajmajucca prablemaj pravoŭ hramadzian.
Viadomyja prykłady, kali ŭ minułym u adnosinach da niekatorych biełaruskich sudździaŭ Eŭrapiejskim Źviazam uvodzilisia sankcyi ŭ vyhladzie zabarony na ŭjezd u Šenhienskuju zonu».
