Estonija zabaraniła svaim žycharam supracoŭničać sa «Sputnikam»
Pavodle šef-redaktara Sputnik Estonija Aleny Čeryšavaj, z 1 studzienia redakcyja była vymušanaja spynić pracoŭnyja adnosiny sa Sputnik Estonija i infarmacyjnym ahienctvam «Rośsija siehodnia». «Departamient palicyi i pamiežnaj achovy Estonii pastaviŭ kožnamu z nas ultymatum: albo my razryvajem pracoŭnyja damovy, albo na nas zaviaduć kryminalnyja spravy», — zajaviła jana.
Adpaviednaja zajava apublikavanaja na sajcie infarmacyjnaha ahienctva.
Čeryšava abiacaje, što «sajt praciahnie pracu ŭ poŭnym abjomie», adnak supracoŭnikam ahienctva patrebny niejki čas, «kab nie žyć pad pastajannym ciskam z boku ŭładaŭ Estonii». «Naturalna, my pastarajemsia adnavić pracu maksimalna chutka», — dadała jana.
Hałoŭnaja redaktarka Russia today i «Rośsija siehodnia» Marharyta Simańjan źviarnułasia sa skarhaj da hienieralnaha sakratara AAN Antoniu Hutereša i paprasiła jaho «źviarnuć asabistuju ŭvahu na dyskryminacyjnyja miery» ŭ dačynieńni da žurnalistaŭ.
Prapahandysckaje ahienctva Sputnik Estonija ŭvachodzić u Mižnarodnaje infarmacyjnaje ahienctva «Rośsija siehodnia» i z 2014 hoda znachodzicca pad sankcyjami Jeŭrasajuza. 18 śniežnia supracoŭniki Sputnik atrymali ad departamienta palicyi i pamiežnaj achovy Estonii listy z papiaredžańniem, što jany padpaduć pad kryminalny pieraśled, kali jany da 1 studzienia 2020 hoda nie spyniać pracoŭnych adnosin z «Rośsijaj siehodnia». U śniežni supracoŭnikaŭ ahienctva vymusili pakinuć arandavanaje pamiaškańnie ŭ Talinie, a filijały zamiežnych bankaŭ zamarozili pieravod zarobkaŭ im.
Internet-sajty pad brendam «Sputnik» byli stvoranyja Rasijaj u roznych krainach śvietu, u tym liku, u Biełarusi. Hetyja sajty atrymlivajuć ščodraje finansavańnie z rasijskaha dziaržaŭnaha biudžetu, u tym liku, na pramocyju svajho kantentu ŭ sacyjalnych sietkach. U mnohich krainach «Sputnik» abvinavačvali ŭ raspaŭsiudzie dezinfarmacyi.
