Žychar Słuckaha rajona sa znajomymi rabavaŭ starych i padpalvaŭ ich damy
Žychar Słuckaha rajona sa znajomymi rabavaŭ starych i padpalvaŭ ich damy. Śledčyja zaviaršyli rasśledavańnie žorstkich złačynstvaŭ u dačynieńni da sastarełych hramadzian, paviedamiła BiełTA aficyjny pradstaŭnik USK pa Minskaj vobłaści Taćciana Biełanoh.
Uviečary 31 studzienia pravaachoŭnikam pastupiła paviedamleńnie ab tym, što nieviadomy pranik u dom 84-hadovaj piensijanierki ŭ vioscy Suchoŭčycy Kapylskaha rajona. Jon z užyvańniem hvałtu patrabavaŭ ad žančyny śpirtnoha i hrošaj. Adabraŭšy ŭ piensijanierki 30 rubloŭ i samarobnaje vino, mužčyna ŭciok. Paciarpiełaja paviedamiła ab zdareńni susiedziam. Zatym na miesca prybyli pravaachoŭniki i miedyki, a žančynie svoječasova akazali dapamohu.
Asobu padazravanaha vyznačyli — supracoŭniki milicyi zatrymali niepracujučaha i raniej sudzimaha 29-hadovaha žychara Słuckaha rajona. Častka vykradzienaha była ŭ jaho znojdziena i kanfiskavana. Na dumku pravaachoŭnikaŭ, mužčyna datyčny jašče da niekalkich asabliva ciažkich złačynstvaŭ. Ich jon z saŭdzielnikami maskiravaŭ pad pažary.
Zhodna z materyjałami kryminalnaj spravy, 14 studzienia fihurant u zmovie z 33-hadovym adnaviaskoŭcam ździejśniŭ razbojny napad na 79-hadovaha žychara Kapylskaha rajona. Złamyśniki pranikli ŭ jaho dom i patrabavali hrošy, źbivali haspadara. Paśla małodšy viaroŭkaj pasprabavaŭ zadušyć staroha. «Kali piensijanier straciŭ prytomnaść i spyniŭ supraciŭlacca, padpaliŭ dom. Paśla hetaha mužčyny ŭciakli ź miesca złačynstva, zavałodaŭšy 50 rublami», — raspaviała Taćciana Biełanoh.
Takim ža sposabam 21 studzienia ŭžo sumiesna z 25-hadovym znajomym mužčyna zabiŭ 94-hadovaha žychara Słuckaha rajona. «Jany pryčynili sastarełamu haspadaru cialesnyja paškodžańni, vykrali ŭ jaho kala 300 rubloŭ, źniščyli dom, chavajučy ślady, - adznačyła Taćciana Biełanoh. - Zhodna z zaklučeńniem ekśpiertnych daśledavańniaŭ, śmierć paciarpiełych nastupiła ad vostraha atručvańnia čadnym hazam. Heta śviedčyć ab tym, što na momant pažaraŭ jany jašče byli žyvyja».
Śledčyja ŭstanavili, što namier ździejśnić złačynstva ŭ kožnym vypadku ŭ saŭdzielnikaŭ uźnikaŭ paśla sumiesnaha raśpićcia śpirtnoha. 29-hadovy mužčyna viedaŭ ład žyćcia svaich achviar, pakolki raniej dapamahaŭ im pa haspadarcy.
Pa vynikach rasśledavańnia jamu pradjaŭlena abvinavačańnie ŭ zamachu na zabojstva, u dvuch zabojstvach, razboi i ŭ naŭmysnym źniščeńni i paškodžańni majomaści. Što tyčycca jahonych paplečnikaŭ, to 33-hadovy mužčyna abvinavačvajecca ŭ razboi (č.3 art.207 KK) i zabojstvie (č.2 art.139 KK), 25-hadovamu stavicca zabojstva (č.2 art.139 KK), razboj (č.3 art.207 KK), naŭmysnaje źniščeńnie i paškodžańnie majomaści (č.3 art.218 KK), a taksama kradziež, učynieny hrupaj asob (č.2 art.205 KK). Jašče adzin fihurant spravy, 35-hadovy mužčyna, datyčny tolki da adnaho epizodu - jon abvinavačvajecca ŭ hrupavym kradziažy (č.2 art.205 KK).
«Z udziełam abvinavačanych praviedzieny pravierki pakazańniaŭ na miescy i inšyja śledčyja dziejańni, padčas jakich jany dali pryznalnyja pakazańni. Da materyjałaŭ kryminalnaj spravy dałučanyja zaklučeńnia bolš za 30 ekśpiertyz, praviedzienych supracoŭnikami DKSE. Pavodle vysnovaŭ sudova-psichijatryčnych ekśpiertyz, mužčyny źjaŭlajucca ŭ stanie śviadomaści, jany ŭ poŭnaj miery ŭśviedamlali značeńnie svaich dziejańniaŭ i mahli kiravać imi», - prainfarmavała Taćciana Biełanoh.
Troje mužčyn znachodziacca pad vartaj, čaćviorty — pad padpiskaj ab niavyjeździe i naležnych pavodzinach. Kryminalnaja sprava pieradadziena prakuroru dla nakiravańnia ŭ sud.
