I viedała, i ŭsio roŭna papałasia: žycharka Maładziečna za niekalki chvilin straciła 3000 rubloŭ
Za niekalki chvilin razmovy z machlarkaj 50-hadovaja žycharka Maładziečanskaha rajona straciła kala 3000 rubloŭ. Hrošy žančyna źbirała na pajezdku ŭ sanatoryj. Žančyna pryznałasia, što čuła pra takija ašukanskija schiemy, ale ŭžo vielmi pierakanaŭčaj była łžesupracoŭnica banka, paviedamlaje abłasnaja milicyja.
Žančynie patelefanavali nibyta ź Biełarusbanka 4 śniežnia kala 19 hadzin. Na inšym kancy provada dziaŭčyna paviedamiła, što ad imia paciarpiełaj pastupiła anłajn-zajaŭka na kredyt bolš za 2000 rubloŭ. Spačatku razmova ź nieviadomaj nie składvałasia. Abhruntavaŭšy, što nie źjaŭlajecca trymalnikam karty nazvanaha banka, viaskoŭka pakłała słuchaŭku.
Zvanok paŭtaryŭsia — akazałasia, prablemy paŭstali i z toj płaciožnaj kartkaj, jakaja jość na rukach zajaŭnicy. Jak adznačyła paciarpiełaja, dyjałoh byŭ nastolki piśmienna vybudavany, što, maŭlaŭ, vakoł afierysty i treba nieadkładna ratavać svaje źbieražeńni.
Pa słovach dziaŭčyny, adzina pravilny sposab zaścierahčy siabie - pastavić padvojnuju abaronu. Zaniepakojenaja žančyna adrazu ž pahadziłasia na prapanovu banka i pradyktavała ličby, jakija pryjšli joj u sms-paviedamleńni, maŭlaŭ, novy parol kartki. Nastupnaje apaviaščeńnie ŭžo było ab śpisańni bolš za 2 800 rubloŭ.
