Što viadoma pra baćkoŭ i siamju novaha kiraŭnika Administracyi prezidenta Ihara Sierhiejenki
Pieršy namieśnik staršyni KDB Ihar Sierhiejenka staŭ novym staršynioj Administracyi prezidenta. Jon zaniaŭ adnu z najvažniejšych pasadaŭ u krainie — mienavita Sierhiejenka budzie padbirać dla Łukašenki kandydataŭ na ŭsie značnyja pasady.
Pra pryvatnaje žyćcio śpiecsłužbista amal ničoha nieviadoma, ale «Naša Niva» znajšła niekalki faktaŭ pra baćkoŭ i siamju novaha top-čynoŭnika.
Ihar Sierhiejenka naradziŭsia ŭ 1963 hodzie ŭ vioscy Stalica, što na Šarkaŭščynie. Heta było źviazana z pracaj jaho baćki.
Niekatoryja staryja žychary Stalicy i pa siońnia pamiatajuć siamju Sierhiejenkaŭ. Kažuć, aboje, i Piatro Michajłavič, i Hanna Ryhoraŭna byli nastaŭnikami. Spačatku pracavali ŭ susiednim miastečku Hiermanavičy, ale ŭ pačatku 1950-ch Piatra nakiravali ŭ Stalicu padymać miascovy kałhas «Svaboda». Jon staŭ staršynioj kałhasa, a žonka Hanna praciahnuła pracu ŭ škole — była nastaŭnicaj pačatkovych kłasaŭ.
«U Stalicy kałhas dapamoh im pabudavać dom. Žyli jany dobra, charošaja siamja vielmi. Ale ž praca tady ŭ kałhasie była niaprostaja. Heta siońnia staršynia sieŭ na mašynu i pajechaŭ. A tady biedny Piatro Michajłavič piechatoju chadziŭ. A kałhas vialiki, treba abychodzić ŭsie bryhady. Jon i chadziŭ na svaich dvaich, i ŭletku, u śpioku, i ŭzimku, u choład. Paźniej užo dali kania, ale pieršy čas kałhasy ž byli biednyja, tamu navat staršynia chadziŭ piecham! — uzhadvajuć u vioscy. — Ale ž Piatro Michajłavič byŭ dobrym staršyniom. Kałhas padymaŭsia pacichu, ludzi vybilisia z pracadnioŭ, pačali choć niejki zarobak atrymlivać. Heta jaho zasłuha była».
Padčas žyćcia ŭ Stalicy ŭ Sierhiejenkaŭ naradziłasia troje dziaciej. Dźvie dački — starejšaja Ałła i siaredniaja Ludmiła — i małodšy syn Ihar. Jany pačali chadzić u škołu ŭ Stalicy, ale paśla siamju Sierhiejenkaŭ pieraviali na inšuju pracu. Jany pierajechali ŭ susiedniuju viosku Bildziuhi. Tam Piatro Michajłavič staŭ dyrektaram škoły.
Adtul Sierhiejenki pierajechali ŭ Dzisnu. Tam u 1990 hodzie pamierła Hanna Ryhoraŭna. Raskazvajuć, što jana ciažka chvareła. U vyniku jana, jak kažuć viaskoŭcy, skončyła žyćcio samahubstvam.
«Chto ž tam viedaje, što zdaryłasia nasamreč… Ale raskazvali, što nie vytrymała niaścierpnaha bolu», — uzhadvajuć viaskoŭcy.
Z taho času Piatro Michajłavič žyŭ adzin. Kali hady pačali brać svajo, baćku zabirali da siabie dzieci. Jon žyŭ to ŭ starejšaj dački ŭ Navapołacku, to ŭ Minsku, u siaredniaj dački i syna.
Pamior Piatro Michajłavič kala dvuch hadoŭ tamu. Pachavali jaho pobač z žonkaj, na mohiłkach vioski Padśville ŭ Hłybockim rajonie.
«Vydatnyja ludzi, dobraja siamja była. Vyhadavali dobrych, razumnych dziaciej», — uzhadvajuć Sierhiejenkaŭ žychary Stalicy.
Kali dzieci Sierhiejenkaŭ vyraśli, to raźjechalisia pa krainie. Ała vyjšła zamuž, siońnia žyvie ŭ Navapołacku, maje darosłych dačku i syna.
«Ała vyjšła zamuž za miascovaha chłopca Ściapana, sa Stalicy. Jany daŭno siabravali, ź dziacinstva. Paśla Ściapan pierabraŭsia ŭ Navapołack pracavać na zavodzie. Jany z Ałaj pabralisia šlubam, i jana taksama pierajechała ŭ Navapołack», — raspaviadajuć u Stalicy.
«Naša Niva» adšukała Ału Piatroŭnu, ale jana admoviłasia ad kamientaŭ pra brata.
Ludmiła pajšła ŭ miedycynu, stała farmaceŭtam, kažuć viaskoŭcy. Siońnia jana žyvie ŭ Minsku. Maje darosłaha syna, praŭda, z mužam raźviałasia.
Ihar Sierhiejenka, jak viadoma, vučyŭsia ŭ viaskovych škołach. Pra jaho viaskoŭcy ŭzhadvajuć tak: «Byŭ čałaviek navuki. Knižki vielmi lubiŭ, pryrodu. Vielmi dobra vučyŭsia ŭ škole».
Paśla Ihar skončyŭ histfak BDU u 1984 hodzie, a z 1988 hoda pracavaŭ u KDB. Kažuć, padčas jaho słužby ŭ Viciebsku jon paznajomiŭsia sa svajoj budučaj žonkaj Alenaj. Na toj momant Ihar užo byŭ padpałkoŭnikam.
«U Aleny ŭžo była dačka ad pieršaha šlubu, Ihar jaje vychoŭvaŭ jak svaju. A paśla naradziłasia i ahulnaja dačka. Vielmi pryhožaja i dobraja dziaŭčynka, siońnia jana vučycca ŭ ci to 8-m, ci to 9-m kłasie», — raskazvajuć viaskoŭcy sa Stalicy.
Paśla Ihar i Alena Sierhiejenki paśpieli pažyć i Hrodnie, i ŭ Mahilovie. Sierhiejenka ŭznačalvaŭ spačatku Hrodzienskaje ŭpraŭleńnie KDB (2005-2010), paśla Mahiloŭskaje ŭpraŭleńnie (2010-2013).
Z 2013 Ihar Sierhiejenka byŭ namieśnikam, paśla pieršym namieśnikam staršyni KDB.
A ciapier źmianiŭ Kačanavu na pasadzie kiraŭnika Administracyi prezidenta.
U Stalicy pra novuju pasadu Ihara Sierhiejenki ŭžo viedajuć i vielmi im hanaracca:
«Siońnia jakraz bačyli pa televizary, što Ihara abrali namieśnikam prezidenta. My vielmi rady za jaho, kaniečnie. Rady, što ad nas taki čałaviek vyjšaŭ!»
Ihar Sierhiejenka
Naradziŭsia ŭ 1963 hodzie ŭ vioscy Stalica Šarkaŭščynskaha rajona. Skončyŭ histaryčny fakultet BDU (1984) i Akademiju kiravańnia (2006). Z 1988 pracavaŭ u KDB.
Uznačalvaŭ Hrodzienskaje ŭpraŭleńnie KDB (2005-2010), Mahiloŭskaje ŭpraŭleńnie KDB (2010-2013). U 2013—2019 namieśnik, paśla pieršy namieśnik staršyni KDB.
Z 2019 — kiraŭnik Administracyi prezidenta.
