Miaśnikoviča adpraŭlajuć na pracu ŭ Maskvu
Fota Nadziei Bužan
Pierśpiektyvy staršynstva Biełarusi i pradstaŭnikoŭ krainy ŭ intehracyjnych abjadnańniach na postsavieckaj prastory stali hałoŭnaj temaj siońniašniaj sustrečy Alaksandra Łukašenki sa staršynioj Savieta Respubliki Michaiłam Miaśnikovičam, pieradaje BIEŁTA.
U lutym 2020 hoda staršynstva ŭ Jeŭrazijskim ekanamičnym sajuzie piarojdzie da Biełarusi. Adnačasova kraina atrymaje prava pryznačyć na čatyry hady svajho staršyniu Kalehii Jeŭrazijskaj ekanamičnaj kamisii. Pradstaŭnik Biełarusi, Stanisłaŭ Zaś, taksama pryznačany hienieralnym sakratarom ADKB z 1 studzienia 2020 hoda. Akramia taho, kraina ŭ nastupnym hodzie budzie staršynstvavać u Vyšejšym dziaržsaviecie Sajuznaj dziaržavy i sustaršynstavavać u SND.
«Havorka idzie pra toje, što budučyja hady dla nas vielmi hanarovyja i ŭ toj ža čas adkaznyja. My faktyčna ŭznačalili uvieś Saviecki Sajuz, — skazaŭ jon. — Pry hetym vy bačycie, jakija intehracyjnyja pracesy iduć. Tamu faktyčna pryjdziecca ciahnuć voz za ŭsich».
Kiraŭnik dziaržavy adznačyŭ, što prapanova ab kandydatury Michaiła Miaśnikoviča na pasadu staršyni Kalehii JEEK była staranna praanalizavana i padrychtavana. «Viadoma, my dumali nad tym, kaho ž rekamiendavać. Praŭda, i žadajučyja byli, — adznačyŭ jon.
— Ale ja liču, što heta vam pad siłu, tolki vam. Bo ŭsie kandydatury, jakija mnie daviałosia razhladać, jany słabiejšyja, mienš daśviedčanyja, mienš dypłamatyčnyja. U vas usie hetyja jakaści jość».
Alaksandr Łukašenka taksama raspavioŭ, što pierad tym jak kančatkova ahučyć svajo rašeńnie, prainfarmavaŭ pra jaho kiraŭnikoŭ krain JEAES.
«Mnie treba było napeŭna, surjozna prakansultavacca i padrychtavać svaich kalehaŭ, — rastłumačyŭ jon. — Vy ž razumiejecie, što naš kandydat pavinien čatyry hady vykonvać hetyja abaviazki. Kandydaturu prapanuje prezident na naš ekanamičny saviet, dzie buduć siadzieć kiraŭniki dziaržaŭ. I chaciełasia b, kab jany biezumoŭna ŭspryniali hetuju kandydaturu. Niepryniaćcia niama. Ja i ŭčora razmaŭlaŭ z šeraham kiraŭnikoŭ. mnohija vas viedajuć. Nie šmatlikija, a ŭsie viedajuć. Takajeŭ (prezident Kazachstana) bolš viedaje: vy pracavali ŭ adnolkavych pasadach. My ź im učora pahavaryli. Usie ŭsprymajuć stanoŭča. Ja liču, ź jakoha boku ni padydzi, i ŭ asabistym staŭleńni, heta niadrenna budzie dla vas — papracavać tam i prynieści karyść nie tolki Biełarusi, ale i ŭsioj našaj ekanamičnaj supolnaści».
