Hrodzieniec hałasavaŭ za adnu kandydatku, ale na jaho ŭčastku ŭsie hałasy — za inšuju. Jak tak?
Hrodna.life pahavaryŭ z Andrejem (imia źmieniena), jaki 17 listapada prachodziŭ lačeńnie ŭ skurviendyspansiery. Tam ža na ŭčastku jon i prahałasavaŭ. A potym pabačyŭ pratakoł i ździviŭsia: 37 hałasoŭ — za Liliju Kirjak, 1 — suprać usich. A jon dakładna viedaje, što hałasavaŭ za Alenu Šałamickuju.
U skurviendyspansiery pacyjenty hałasavali na zakrytym učastku №5 Hrodzienskaj-Centralnaj vybarčaj akruhi. Tam prahałasavała 38 čałaviek. Andrej raskazvaje, što hałasavańnie prachodziła zakonna. Jon pryjšoŭ uniz na učastak, raśpisaŭsia ŭ błanku, atrymaŭ biuleteń z podpisami dvuch členaŭ kamisii, hałasavaŭ u kabincy dla hałasavańnia. A paśla vybaraŭ sutyknuŭsia na vulicy z naziralnikam ź jaho ŭčastka. Ad jaho Andrej daviedaŭsia, što ŭ pratakole napisana, što ŭsie hałasavali za Kirjak. Ale jon dakładna viedaje, što hałasavaŭ za inšaha kandydata.
— Ja viedaju, u jakoj krainie ja žyvu. Što ty daviadzieš? Jak hramadzianin ja razumieju, što treba niešta rabić. Ź inšaha boku, u hetuju balnicu z ulikam svajho zachvorvańnia mnie davodzicca raz u paŭhoda kłaścisia na dva tydni, — raskazvaje Andrej. Jon chvareje na psaryjaz. Jon baicca, što kali pačnie skardzicca, da jaho pačnuć užyvać peŭny cisk u balnicy.
Lilija Kirjak.
