Rumas ź Miadźviedzievym siadzieli siem hadzin, ale intehracyjnych kartaŭ tak i nie ŭzhadnili
Rasija i Biełaruś nie zmahli źniać usie sprečnyja pytańni pa dalejšaj intehracyi. Heta na pres-kanfierencyi pa vynikach pieramoŭ ź biełaruskim premjeram Rumasam pryznaŭ jaho rasijski kaleha Miadźviedzieŭ.
Fota: BiełTA.
Nie ŭzhodnienyja kala dziesiaci tak zvanych darožnych kart. Usiaho ich 31; pa słovach Rumasa, uzhodniena bolš za 20.
«Pytańnie nie ŭ aryfmietycy. Navat kali zastaniecca adna karta niaŭzhodnienyja, praces intehracyi, jaki my pierazapuścili, moža być pastaŭleny pad pahrozu», — skazaŭ Miadźviedzieŭ. Pa słovach Rumasa, u pryvatnaści, zastałosia ŭzhadnić dźvie karty pa naftavym i hazavym rynku.
Pa słovach Miadźviedzieva, z Rumasam jany pahadzilisia z tym, što śpiecyjalisty padrychtujuć novyja viersii darožnych kart, u jakich buduć źviedzieny vyniki siońniašniaj pracy, na hetuju pracu advodzicca tydzień.
«Dalej hety pakiet dakumientaŭ z roznymi pazicyjami bakoŭ budzie ŭniesieny na razhlad kiraŭnikoŭ dziaržaŭ. «Heta byli praduktyŭnyja pieramovy, praduktyŭnaje abmierkavańnie <…> z rasstanoŭkaj akcentaŭ nakont taho, dzie my damovilisia, a dzie my nie damovilisia, dzie jašče jość resurs praciahu pieramoŭ na ŭzroŭni ŭradaŭ — i, napeŭna, my pa hetym šlachu pavinny prajści, a pa jakich pytańniach, pa ŭsioj vierahodnaści, nam pryjdziecca źviarnucca da prezidentaŭ dźviuch krain dla taho, kab jany praviali nieabchodnyja kansultacyi», — skazaŭ Miadźviedzieŭ.
Pieramovy ŭ Horkach praciahnulisia bolš za siem hadzin, choć pa płanie pavinny byli zaniać paru hadzin.
