Davydźka: Čas užo pierastać vučyć Biełaruś žyć pa čužych praviłach
Fota Voli Aficeravaj
Takoje mierkavańnie BiełTA vykazaŭ staršynia respublikanskaha hramadskaha abjadnańnia «Biełaja Ruś», abrany ŭčora deputatam Pałaty pradstaŭnikoŭ Hienadź Davydźka.
«Naša kraina, jak nijakaja inšaja, za apošni čas zrabiła vialiki ryvok, pazbaŭlajučysia ad padvojnych standartaŭ, jakija ŭžyvalisia ŭ adnosinach da nas. Toje, što dazvolena Amierycy ci Japonii, navat nie abmiarkoŭvajecca, što tam, da prykładu, prymianiajecca takaja miera, jak śmiarotnaje pakarańnie. Ci, dapuścim, amierykanskaje zakanadaŭstva ab vybarach, jakoje praduhledžvaje, što naohuł možna hałasavać vydalena, pa kampjutary, jak papała, — jaho nichto navat nie śmieje krytykavać.
Biełaruś ža źjaŭlajecca niejkim palihonam, jak školnik, jakoha ŭsie pavučajuć, jak žyć.
Čas užo davać adpor, stavić na miesca tych naziralnikaŭ i inšych dziejačaŭ, jakija ličać, što možna hrubiejšym čynam ŭmiešvacca i parušać naša zakanadaŭstva», — skazaŭ Hienadź Davydźka.
Pavodle jaho słoŭ, nietaktoŭnyja pavodziny niekatorych naziralnikaŭ na vybarčych učastkach byli naŭmysnymi.
«Usio heta zroblena nie dla taho, kab hetyja vybary byli spraviadlivymi, a dla taho, kab pakazać siabie, svaju niejkuju zacikaŭlenaść i śmiełaść, niejak prasłavicca. Kali b jany kłapacilisia ab zachavańni zakona, Kanstytucyi i sutnaści vybaraŭ, jany b pavodzili siabie zusim pa-inšamu, — adznačyŭ Hienadź Davydźka. — Jašče raz padkreślu: da nas staviacca, jak da niejkich niadbajnych vučniaŭ, što nie žadaje vučycca.
Pavučać nas ličycca narmalnym, a pra Jeŭropu nichto navat i nie nadumaje kazać. Byccam by, jak aksijoma, što ŭsio, što robicca tam, usie kaštoŭnaści — nieparušnyja, viernyja. Ale heta prydumała sama Jeŭropa. A da nas, našym tradycyjam i našamu zakanadaŭstvu, kali łaska, prajaŭlajcie pavahu».
