ES zaćvierdziŭ rašeńnie ab padpisańni vizavaj damovy ź Biełaruśsiu
Rada ES zaćvierdziła rašeńnie ab padpisańni ź Biełaruśsiu pahadnieńnia ab palahčeńni vydačy vizaŭ. Pra heta śviedčyć tekst pastanovy Rady Jeŭrasajuza, apublikavany ŭ Aficyjnym časopisie ES, piša Tut.by.
«Padpisańnie ad imia ES Pahadnieńnia ab spraščeńni vydačy viz pamiž Jeŭrapiejskim sajuzam i Biełaruśsiu z hetaha momantu dazvolena, jak tolki budzie zavieršana padrychtoŭka jaho tekstu. Tekst pahadnieńnia budzie apublikavany razam z aficyjnym rašeńniem ab jaho zaklučeńni», — havorycca ŭ dakumiencie.
U im taksama pakazana, što «hetym staršynia Rady ŭpaŭnavažany pryznačyć asobu, upaŭnavažanuju padpisać pahadnieńnie».
Pryniaćcie Radaj ES rašeńnia ab padpisańni dakumienta było pieradapošnim etapam — zaraz čakajecca tolki padpisańnie pahadnieńnia usimi bakami.
Pahadnieńnie pa spraščeńni vizavaha režymu praduhledžvaje źnižeńnie koštu viz da 35 jeŭra i pryniaćcie rašeńnia ab vydačy vizy ŭ termin da 10 dzion (u vypadku dadatkovaj pravierki termin vydačy moža pavialičycca da 30 dzion).
Ciapier usio ŭpirajecca ŭ terminy padpisańnia pahadnieńnia. Paśla padpisańnia pahadnieńnia ŭsimi bakami jano ŭstupić u siłu pieršaha čysła druhoha miesiaca paśla abmienu ratyfikacyjnymi hramatami.
Adnak užo ŭ lutym 2020 hoda pačnuć dziejničać novyja praviły vydačy vizaŭ Jeŭrasajuzam. Kali Biełaruś i ES nie paśpiejuć padpisać pahadnieńnie ŭ listapadzie, to biełarusam za vizu zamiest 60 jeŭra (mienavita stolki kaštuje dla nas «šenhien» ciapier) abo zamiest 35 jeŭra (stolki vizy buduć kaštavać paśla pryniaćcia pahadnieńnia ź ES) pryjdziecca zapłacić 80 jeŭra.
Raniej čakałasia, što dla padpisańnia pahadnieńnia ab spraščeńni vizavaha režymu, jakoje dazvolić biełarusam płacić za «šenhien» 35 jeŭra, razhladajecca mahčymaść pryjezdu ŭ Minsk pradstaŭnika ES pa zamiežnych spravach i palitycy biaśpieki Fiederyki Mahieryni. Ale vizit adkłali z-za «peŭnych nakładak».