Prestyžnuju premiju imia Jadkoŭskaha atrymaŭ historyk Miečysłaŭ Supron
8 listapada ŭ Centry haradskoha žyćcia nazvali najlepšaha krajaznaŭcu Hrodna 2019 hoda. Uznaharodu imia Juzafa Jadkoŭskaha atrymaŭ historyk Miečysłaŭ Supron, piša hrodna.life.
Sioleta hrodzienskija historyki i krajaznaŭcy vyznačyli troch kandydataŭ na Premiju Jadkoŭskaha. Heta byli biblijohrafka Luboŭ Turmasava, historyk Miečysłaŭ Supron i žurnalist Hrodna.life Rusłan Kulevič. Bolšaść hałasoŭ rada premii addała za historyka Miečysłava Suprona.
Miečysłaŭ Supron apošnija hady aktyŭna zmahajecca za zachavańnie historyka-kulturnaj spadčyny Hrodna. Na asnovie zdabytych im materyjałaŭ jon raspracavaŭ prajekt zabudovy častki vulicy Zamkavaj z Domam Rybaka, pierakanaŭ zabudoŭščykaŭ u nieabchodnaści maštabnych raskopak u hetym miescy i adbudovie rajona maksimalna blizka da histaryčnaha vyhladu.
Miečysłaŭ Supron niekalki razoŭ źviartaŭsia ŭ prakuraturu pa inšych pytańniach, damohsia raskopak na vulicy Vialikaja Trajeckaja za sinahohaj. Razam z daśledčykam Ščukinym jon zrabiŭ šerah navukovych 3D-rekanstrukcyj stračanych i zachavanych hrodzienskich budynkaŭ. Taksama Miečysłaŭ Supron zmahajecca za aŭtentyčnaść rekanstrukcyi Staroha zamka ŭ Hrodnie, jakaja ŭžo padychodzić da druhoj čarhi.
— Ja zadavoleny, što atrymaŭ hetuju ŭznaharodu. U niekatorym sensie dla mianie jana niečakanaja. Niejak apošnim časam słaba saču za padziejami ŭ kulturnaj śfiery horada, bo maju šmat inšaj pracy. Tamu byŭ uražany, što mianie abrali. A tak ja dumaŭ, što premiju atrymaje Rusłan Kulevič, jaki ciaham apošniaha hoda naźbiraŭ šmat historyj pra Hrodna. Ale kali samyja aŭtarytetnyja ludzi tak vyrašyli, značyć zasłužanaja pieramoha. Mnie zdajecca, jana za papularyzacyju historyka-architekturnaj spadčyny i abaronu starych budynkaŭ u Hrodnie, — raspavioŭ Miečysłaŭ Supron.
Premija imia Juzafa Jadkoŭskaha zasnavanaja ŭ 2012 hodzie hrodzienskimi historykami. Štohod jaje ŭručajuć tym, chto zrabiŭ značny ŭniosak u vyvučeńnie abo papularyzacyju historyi Hrodna a taksama paspryjaŭ zachavańniu pryrodnaj i historyka-kulturnaj samabytnaści Hrodna i rehijona. U rozny čas premiju atrymlivali viadomyja historyki i krajaznaŭcy: Andrej Vaškievič, Aleś Hościeŭ, Taćciana Kasataja, Viktar Sajapin, Fiodar Ihnatovič, Taćciana Jeŭdakimava, Natalla Kaniuk, Ihar Łapiecha.
