BKK i «Urałkalij» padpisali kantrakty na pastaŭku chłorkaliju Indyi
Fota Dźmitryja Bruško
Bujnyja suśvietnyja eksparciory chłorkaliju, AAT «Biełaruskaja kalijnaja kampanija» i rasijski «Urałkalij» abviaścili pra zaklučeńnie doŭhaterminovych kantraktaŭ z adnym z dvuch klučavych suśvietnych pakupnikoŭ kalijnych uhnajeńniaŭ, indyjskaj IPL, piša Tut.by.
BKK 26 kastryčnika abviaściła pra padpisańnie kantraktu na pastaŭku kalijnych uhnajeńniaŭ na indyjski rynak pa canie 280 dalaraŭ za tonu CFR. «Heta pahadnieńnie budzie sadziejničać pavieličeńniu popytu z boku indyjskich fiermieraŭ, a taksama źjaŭlajecca paćviardžeńniem ahulnaha imknieńnia BKK i IPL da harmaničnaha i ŭstojlivaha raźvićcia haliny. Ustalavany košt nie tolki adlustroŭvaje biahučuju kanjunkturu, ale i stvaraje pierśpiektyvu dla aktyvacyi biznesu ŭhnajeńniaŭ va ŭsich klučavych rehijonach», havorycca ŭ paviedamleńni kampanii.
Košt minułaha kantraktu BKK i IPL, zavieršanaha letam 2019 hoda, byŭ na ŭzroŭni 290 dołaraŭ. Adnak u hetym hodzie ekśpierty kazali ab niekatoraj niavyznačanaści na rynku na fonie praficytu mahutnaściaŭ i značnych zapasaŭ u asnoŭnych vytvorcaŭ.
«Ciapier, hledziačy na niavyznačanaść pa šerahu rynkaŭ, my na bližejšyja 3-4 miesiacy čakajem nievialikaje źnižeńnie abjomaŭ — da 30% dla padtrymańnia aptymalnaha ŭzroŭniu popytu i prapanovy. Heta dobry čas, kab pravieści ramonty na abahačalnaj fabrycy i inšym abstalavańni», — adznačaŭ na kanfierencyi ŭ Minsku ŭ pačatku vieraśnia hiendyrektar «Biełaruśkalija» Ivan Hałavaty.
Chłorkalij — adzin z klučavych ekspartny pradukt Biełarusi. Ekspartnyja pošliny ad jaho pastavak tradycyjna ŭnosiać prykmietny ŭkład u farmiravańnie biudžetu krainy.
Na dzień raniej, 25 kastryčnika, «Urałkalij» paviedamiŭ ab padpisańni svajoj «dačkoj» «Urałkalij Trejdynh» kantraktu z IPL na pastaŭku chłorystaha kaliju z kastryčnika 2019 hoda pa 31 sakavika 2020 hoda. Canu kantraktu rasijskaja kampanija nie nazyvaje, ale adznačana, što jana «spraviadliva adlustroŭvaje biahučuju kanjunkturu na suśvietnym kalijnym rynku». «My pa-raniejšamu ŭpeŭnienyja ŭ fundamientalnych charaktarystykach kalijnaj haliny i miarkujem, što zaklučanaje pahadnieńnie stanie stymułam rostu popytu na kalijnyja ŭhnajeńni na asnoŭnych rynkach spažyvańnia», — havorycca ŭ paviedamleńni.
