Rasijskija vajskoŭcy raźmiaścilisia na siryjska-tureckaj miažy
Rasijskaja vajennaja palicyja pačała razhortvańnie ŭzdoŭž turecka-siryjskaj miažy ŭ ramkach pahadnieńnia pamiž Rasijaj i Turcyjaj. Razam ź siryjskaj armijaj rasijskija vajskoŭcy buduć kantralavać adstupleńnie kurdskaj samaabarony za miežy 30-kiłamietrovaj pamiežnaj zony, piša bbc.com.
Kurdskija farmavańni, jakija Turcyja ličyć terarystyčnymi i jakija ŭ minułym byli sajuźnikami ZŠA, pavinny pakinuć miažu na praciahu šaści dzion.
Tureckija vojski, pavodle damoŭlenaściej pamiž prezidentam Rasii Uładzimiram Pucinym i prezidentam Turcyi Redžepam Taipam Erdahanam, zachavajuć kantrol nad siryjskaj terytoryjaj, jakuju jany zachapili z 9 kastryčnika, na niavyznačany termin.
Turcyja 9 kastryčnika pačała nastup na kurdaŭ, jakich jana ličyć źviazanymi z Rabočaj partyjaj Kurdystana, paśla taho, jak prezident ZŠA Donald Tramp abviaściŭ pra vyvad vojskaŭ z rehijonu.
Zhodna z pahadnieńniem, kurdy pavinny pakinuć pamiežnyja zony na praciahu 150 hadzin, paśla čaho miažu buduć patrulavać rasiejcy i siryjcy, a rasiejskija i tureckija vajskoŭcy buduć patrulavać terytoryju za dziesiać kiłamietraŭ ad miažy.
Prezident ZŠA Donald Tramp, jakoha krytykavali i demakraty, i respublikancy za rašeńnie vyvieści vojski ź Siryi, nazvaŭ pahadnieńnie Erdahana-Pucina ab kurdach «vialikim pośpiecham» i admianiŭ sankcyi suprać Turcyi.
