Jarmošyna papiaredziła, što za paklop u sacsietkach i vystupach kandydaty ŭ deputaty mohuć pazbavicca svajho statusu
Niekatoryja kandydaty ŭ deputaty ŭsprymajuć kampaniju jak surjoznuju palityčnuju baraćbu z surjoznymi palityčnymi abvinavačvańniami, zajaviła kiraŭnik CVK Lidzija Jarmošyna. Jana nahadała, što parušalniki mohuć pazbavicca svajho statusu za paklop ci abrazy, navat u sacsietkach i vystupach, źviarnuŭ uvahu TUT.BY.
— Dumaju, nie za harami pieršyja infarmacyjnyja sprečki, tamu što niekatoryja kandydaty ŭsprymajuć dadzienuju kampaniju jak surjoznuju palityčnuju baraćbu z surjoznymi palityčnymi abvinavačvańniami. (…) Tamu, ja dumaju, tut chutka ŭsio zaburlić, — skazała Lidzija Jarmošyna ŭ intervju Nacyjanalnamu pres-centru.
Pavodle jaje słoŭ, mohuć uźniknuć pytańni, ci nie parušajuć kandydaty praviły. Bo artykułam 47 Vybarčaha kodeksa prapisany abmiežavańni dla pieradvybarčaj ahitacyi i prapahandy.
— Hetyja abmiežavańni nie tyčacca raźmiaščeńnia infarmacyi ŭ sacsietkach? — udakładniła žurnalistka.
— Nie, heta tyčycca tolki infarmacyi ŭ ŚMI. Ale kali kandydat budzie i ŭ sacsietkach, i ŭ svaich vystupach dapuskać paklop, abrazy, raspalvać sacyjalnuju varožaść, zaklikać da hvałtoŭnaha źviaržeńnia kanstytucyjnaha ładu, to heta padstavy dla admieny jaho rehistracyi ŭ jakaści kandydata ŭ deputaty.
