Stała viadoma, što adkryje Łukašenka ŭ pačatku listapada
U pieršy tydzień listapada čakajecca vizit Alaksandra Łukašenki ŭ Cielachany. Tam buduć zapuskać novuju łyžnuju vytvorčaść.
«Łyžnaje pytańnie» Łukašenka nieadnarazova ŭzdymaŭ u 2018 hodzie. Naprykład, minułaj vosieńniu jon naviedaŭ vystavu zimovaj techniki, spartyŭnaha invientara i muzyčnych instrumientaŭ ajčynnaj vytvorčaści. Tam jon zastaŭsia niezadavoleny pradukcyjaj, jakuju vyrablajuć u Cielachanach.
«Heta ty koŭzajsia sam na ich, — skazaŭ Łukašenka Viktaru Šejmanu, kiraŭniku spraŭ Administracyi prezidenta. — Kali niechta ich paprosić u ciabie — rabicie. Ale zamaŭlać hetyja łyžy ŭ ciabie siłaj my nie budziem. Heta ŭžo dubovyja łyžy, syšli hetyja łyžy ŭžo. Nu tak, dla piensijaniera — moža być».
A sioleta zimoju padčas spartovaha mierapryjemstva «Minskaja łyžnia» Łukašenka paabiacaŭ, što ŭ Biełarusi chutka źjaviacca svaje jakasnyja łyžy.
«Čas — heta adzin hod. Da nastupnaj zimy my budziem mieć dobryja łyžy, — paabiacaŭ Łukašenka. — «Čaraviki zrabili, pałki zrabili, usio zrabili. «Marka» mnie pieradali čaraviki — vydatnyja. Pieršyja ja zabrakavaŭ. Druhuju paru pieradali — vydatnyja. Trymajuć dobra łyžy. Małajcy! Łyžy dla pačatkoŭcaŭ jość. Ale nam patrebnyja siarednija i ledź vyšej siaredniaha ŭzroŭniu, kab padrychtavać spartoŭcaŭ. My hetyja łyžy zrobim».
I voś, u listapadzie ŭ Cielachanach adkryjuć novy cech pa vytvorčaści łyž. Ciapier zamiest draŭlanych buduć vypuskać płastykavyja łyžy.
«Ciapier idzie padrychtoŭka, u pačatku listapada płanujecca zapusk vytvorčaści, — paviedamili «Našaj Nivie» na pradpryjemstvie. — Adkryjecca cech, dzie buduć vypuskać łyžy pa novaj technałohii. Ciapier — z płastyku».
Piersanał častkova pieravučyli, častkova nabrali novych.
Taksama na pradpryjemstvie paćvierdzili, što na ŭračystym adkryćci cecha čakajecca Łukašenka. Dakładnyja terminy vizitu pakul nibyta nieviadomyja, ale čakajecca, što Łukašenka naviedaje Cielachany z 4 pa 8 listapada.
Cikava, što padčas pajezdki ŭ Sočy ŭ lutym Łukašenka kataŭsia na łyžach razam z Uładzimiram Pucinym. Jak vyśvietlili žurnalisty, łyžy Łukašenki byli nie ź Cielachan, a zamiežnaj vytvorčaści, pryčym — ručnoj pracy.
Ich rabiła aŭstryjskaja firma Volant — heta padraździaleńnie viadomaha vytvorcy łyž Atomic. Madel, na jakoj kataŭsia Łukašenka nazyvajecca Volant Pure Black madelnaha šerahu 2015 hoda. U ich kanstrukcyi — naturalnaje dreva, nieržaviejučaja stal, karbonavyja ŭstaŭki. Košt takich łyžaŭ — 2300 jeŭra.