Łukašenka raskazaŭ, jak razam ź Jelcynym prapanoŭvaŭ Klintanu pasadu ŭ Sajuznaj dziaržavie
Pra heta jon raspavioŭ siońnia na sustrečy ŭ Akademii kiravańnia, pieradaje BIEŁTA.
Raspaviadajučy ab raspracoŭcy novaha zakona ab dziaržsłužbie, Alaksandr Łukašenka adznačyŭ, što Biełaruś choć i abapirajecca na novy vopyt, ale pavinna ŭ pieršuju čarhu zychodzić nie z zapazyčańnia niejkich zamiežnych madelaŭ, a z pryjarytetaŭ svajoj dziaržaŭnaj palityki.
Svoj tezis kiraŭnik dziaržavy padmacavaŭ vypadkam z žyćcia. Jon uspomniŭ, jak u kułuarach mižnarodnaha samita [u listapadzie 1999 h. u Stambule — NN] sustreŭsia z tahačasnymi lidarami Rasii i ZŠA Barysam Jelcynym i Biłam Klintanam [prezident ZŠA sa studzienia 1993 pa studzień 2001 — NN]. Prezident Amieryki źbiraŭsia pakidać svaju pasadu i, pavodle słoŭ Alaksandra Łukašenki, pakul nie viedaŭ, čym budzie zajmacca dalej.
Fota z archiva KP
«Ja Jelcynu kažu: «Słuchaj, Barys, davaj jamu prapanujem pasadu? «Jon na mianie hladzić surjozna: «Jakuju?» Ja kažu: «U Sajuznaj dziaržavie jaho voźmiem kiraŭnikom, jon ža ŭ nas usio roŭna z našaj padačy budzie vyrašać tam prablemy». Jelcyn zyčnym hołasam zarahataŭ, što ŭsie na nas źviarnuli ŭvahu. Klintan taksama śmiajecca, ale nie razumieje, pra što my havorym. Pierakładčyk jamu pieravioŭ — jon jašče bolš pačaŭ śmiajacca», — raskazaŭ Łukašenka.
Kiraŭnik dziaržavy tady zaŭvažyŭ, što nie daj boh prezidentu ZŠA kiravać ŭ Biełarusi ci Rasii. «Daviadziecca zajmacca i fiermami, i bulbaj, a nie tolki mierkavańniami ludziej, — rastłumačyŭ Alaksandr Łukašenka. — Panazirajcie za pracaj prezidentaŭ na postsavieckaj prastory i našaha lubimaha i pavažanaha Donalda Trampa — dźvie vialikija roźnicy».
«Tamu z zamiežnym vopytam treba być akuratniej, nie tolki na samym viersie, ale i naohuł», — reziumavaŭ jon.
