Ukraina źmianiła praviły adboru na «Jeŭrabačańnie»: na konkurs moža pajechać tolki toj, chto nie vystupaŭ u Rasii i Krymie
Va Ukrainie źmianili praviły ŭdziełu ŭ nacyjanalnym adbory na konkurs «Jeŭrabačańnie». Jak paviedamlaje telekampanija STB, uziać udzieł u nacadbory ciapier mohuć tolki vykanaŭcy, jakija nie hastralavali ŭ Rasii, a taksama ŭ Krymie. Pra heta piša TUT.BY.
«Ciapier udzielnikam nacyjanalnaha adboru moža być vykanaŭca abo kalektyŭ, jaki nie ździajśniaŭ kancertnaj dziejnaści na terytoryi RF z 2014 hoda, nie płanuje i nie anansuje takuju padčas konkursu i da finału «Jeŭrabačańnia», a taksama nie zajazdžaŭ na terytoryju Kryma z parušeńniem zakanadaŭstva Ukrainy. Za vyjaŭlenyja parušeńni praviłaŭ ŭdzielniki Nacyjanalnaha adboru mohuć być dyskvalifikavanyja», — paviedamlajuć arhanizatary.
«Jeŭrabačańnie-2019» Ukraina prapuściła z-za skandałaŭ padčas nacyjanalnaha adboru. Spačatku jaho pieramožca MARUV admoviłasia ad udziełu ŭ konkursie, zajaviŭšy, što «nie hatovaja vystupać z łozunhami, jakija pieratvarajuć udzieł u konkursie ŭ proma-akcyi palitykaŭ».
Vykanaŭcy, jakija zaniali ŭ nacadbory druhoje i treciaje miescy, — Freedom Jazz i Kazka — adchilili prapanovu zamianić MARUV.
U vyniku arhanizatary pryniali rašeńnie «z-za praźmiernaj palityzacyi nacyjanalnaha adboru» admovicca ad udziełu ŭ konkursie.
