Novym kamandujučym unutranymi vojskami staŭ Juryj Nazaranka — fakty pra pałkoŭnika
Łukašenka pryznačyŭ novaha kamandujučaha ŭnutranymi vojskami MUS, im staŭ pałkoŭnik Juryj Nazaranka. U namieśniki ministra ŭnutranych spraŭ jon pierachodzić z načalnika štaba Słužby biaśpieki prezidenta (SBP).
Ahułam, karjera Nazaranki nie liniejnaja — jon užo słužyŭ va ŭnutranych vojskach, ale zrabiŭ niekalki pierachodaŭ tudy-nazad z SBP.
Pačać treba z taho, što ŭ vojska Nazaranka, jaki sam byŭ synam aficera i pajeździŭ u dziacinstvie pa Sajuzie, trapiŭ, natchniŭšysia pakazalnym vystupam śpiecnaza.
Heta i padšturchnuła spačatku pastupić i skončyć fakultet unutranych vojsk i kamandna-štabny fakultet Vajskovaj akademii.
Potym była słužba ŭ v/č 3214, pieravod u Brest u v/č 5526, adkul jon pierajšoŭ u Słužbu biaśpieki prezidenta.
Jak śćviardžajuć krynicy «Našaj Nivy», u čas svajoj pieršaj słužby ŭ SBP Nazaranka dasłužyŭsia da načalnika adździeła, ale dalej u tym kalektyvie pierśpiektyvaŭ prasunucca pa słužbie nie było, tamu jon pryniaŭ prapanovu ŭznačalić Śpiecyjalny atrad chutkaha reahavańnia (SACHR), kudy ŭžo niejki čas šukali kamandzira.
Tam jon prajaviŭ siabie tym, što vyčyściŭ atrad ad tych, chto nie ŭpisvaŭsia ŭ maralna-prafiesijnyja ŭjaŭleńni Nazaranki ab bajcach śpiecatrada.
«Byŭ čałaviek, jaki palavaŭ i tajemna pradavaŭ voŭčyja škury, jak IP, a tak nielha — vylacieŭ», — kažuć našy krynicy.
Rabota Nazaranki ŭ SACHR była aceniena stanoŭča i jon znoŭ viarnuŭsia z SBP, ale adrazu načalnikam štaba.
U vyniku, z prychodam Karajeva jon trapiŭ u śpis z troch kandydatur, jakija toj prapanoŭvaŭ vyšej na pasadu namieśnika ministra — kamandujučaha ŭnutranymi vojskami.
Praŭda, ličyłasia, što samaja imaviernaja fihura heta Ihar Burmistraŭ, jaki byŭ namieśnikam Karajeva va ŭnutranych vojskach — toj navat niadaŭna atrymaŭ hienierała.
Ale niejki čas tamu u viedamstvie ŭžo pačali havaryć pra toje, što kamandujučym stanie Nazaranka.