Praciŭniki zavoda AKB: Prysud mužčynu, jaki napaŭ na aktyvistku, zanadta miakki
U Bieraści na płoščy Lenina 13 kastryčnika apoŭdni sabralisia praciŭniki budaŭnictva akumulatarnaha zavodu. Takija sustrečy prachodziać tut kožnuju niadzielu z 25 lutaha 2018 hodu, piša radyjo «Svaboda».
Pavodle pravaabaroncy Ŭładzimira Vialičkina, u 12.40 na płoščy było 116 čałaviek. Milicyja praz mehafon papiaredžvała prysutnych ab adkaznaści za praviadzieńnie niesankcyjanavanaj akcyi.
Udzielniki sustrečy abmiarkoŭvali rašeńnie sudu Bieraściejskaha rajonu, jaki 10 kastryčnika razhledzieŭ materyjały administracyjnaj spravy mužčyny, jaki napaŭ na praciŭnicu akumulatarnaha zavoda Maryju Hałaluk.
Mužčynu, jaki napaŭ na aktyvistku «śvincovaj varty» ŭ Breście, aštrafavali
Aktyvisty vykazali abureńnie miakkim, na ich dumku, pakarańniem. Jany ličać, što sud «nia byŭ biesstarońnim». Aktyvisty ličać, što suma štrafu niesuvymiernaja z učynkam. Pry hetym jany adznačyli, što praciŭnikaŭ zavoda štrafavali za «mienš značnyja parušeńni na značna bolšaj sumy».
Taksama praciŭniki zavoda abmiarkoŭvali ŭdzieł svaich aktyvistaŭ u parlamenckich vybarach. Heta błohier Alaksandar Kabanaŭ, siabra AHP, bieraściejec Raman Kiślak, žycharka Bieraściejskaha rajonu Alena Makarevič i žychar Kobrynu Ŭładzimier Maroz. Aktyvisty vykazvali ŭpeŭnienaść, što ŭsich čaćviarych zarehistrujuć. «Ich užo zarehistravaŭ narod, pastaviŭšy podpisy za ich vyłučeńnie», — zajaviŭ adzin z udzielnikaŭ sustrečy.
Paśla sustrečy na płoščy praciŭniki zavodu prajšli pa centralnych vulicach Bieraścia.