Kiraŭnik Minska raskazaŭ, što prymaje rašeńni z ulikam kamientaroŭ u internecie
Karespandent «Našaj Nivy» parazmaŭlaŭ z kiraŭnikom Minska Anatolem Sivakom u kułuarach «Minskaha dyjałoha».
My spytalisia, jakija prablemy horada zdajucca jamu asnoŭnymi, toj ukazaŭ na kamunalnyja pytańni, nazvaŭšy ich «doškaj hańby»: u asobnych rajonach pierapoŭnienyja sadki i škoły, niedzie jość nieakulturanyja zialonyja i žyłyja zony.
«U bližejšyja try hady pabudujem 20 novych ustanovaŭ adukacyi», — zapeŭniŭ jon.
«Ja voś čytaju kamienty pra siabie i pra haradskuju palityku ŭ internecie. I ŭsprymańnie hetaj krytyki roznaje: jość cikavy kanstruktyŭ, a jość prosta abrazy. Kaniečnie, lubyja dziejańni ty karektuješ z ulikam mierkavańnia ludziej. I tut momant, što voś kali ŭkazvajuć na prablemy, to ja navat niedzie paśmichajusia, bo, daliboh, mahu pieraličyć hetych prablem bolš, čym chto z kamientataraŭ. I kaniečnie viedaju, dzie i što patrabuje rašeńnia. A voś chaj by jany lepš davali tałkovyja parady adrazu, jak toje ci inšaje zrabić lepš, tańniej — prapanoŭvali, a nie tolki krytykavali!» — skazaŭ Sivak.
Taksama jon parazvažaŭ pra turyzm.
«My nie imkniemsia zrabić Minsk padobnym da niejkaha inšaha horada. Trochu voś turystaŭ u nas paboleła, kali vieryć statystycy. Jość prablema, što ŭ horadzie abjektyŭna nie skłałasia ź niejkaj staradaŭniaj zabudovaj, cikavymi muziejami, architekturaj.
Ja voś niedzie vyčytaŭ paniaćcie «tusovačny turyzm», moža, navat u vas. Voś heta šaniec!
Pra jaho aktyŭna havorać miesiacy try, nakirunak zdajecca cikavym. I tyja mižnarodnyja padziei, jakija prachodziać u Minsku, jamu spryjajuć. Ja nie chaču skazać «davajcie bolš Zybickich pabudujem i turyst paciahniecca», ale heta adno z adnaho vynikaje. Napeŭna, u bližejšy čas sa śpiecyjalistami raźbiaremsia, jakija miescy Minska mahli b stać našymi turystyčnymi fiškami, pakul niedastatkova raśpijaranymi», — dadaŭ kiraŭnik Minska.
