Navukoŭcy raskazali, z čaho varta pačać kałanizacyju Marsa
U artykule, apublikavanym u časopisie FEMS Microbiology Ecology, śćviardžajecca, što «pieršymi kałanistami» Marsa pavinny być mikraarhanizmy — bakteryi, virusy i hrybki, jakija padtrymlivajuć mnohija žyćciovyja pracesy tut, na Ziamli, piša Science Alert.
Žyćcio, jak my viedajem, nie moža isnavać biez karysnych mikraarhanizmaŭ. Kab vyžyć na biaspłodnych sterylnych płanietach, nam pryjdziecca brać z saboj karysnyja mikroby, ličać navukoŭcy.
Ideja, pradstaŭlenaja ŭ artykule, zaklikaje admovicca ad strohich pryncypaŭ, jakija nie dapuskajuć «zabrudžvańnia» inšych płaniet ziamnymi mikraarhanizmami. Zaraz pierad tym, jak abstalavańnie adpraŭlajecca ŭ kosmas, jano pavinna prajści sanitarnuju apracoŭku, što dazvalaje zachoŭvać asiarodździe ŭ pieršapačatkovym vyhladzie. Źjaŭleńnie na Marsie ziamnych mikrobaŭ pieraškodzić pošuku prymiet nieziamnoha žyćcia.
Adnak navukoŭcy ŭ artykule ŭ časopisie FEMS Microbiology Ecology śćviardžajuć, što ŭviadzieńnie karysnych mikrobaŭ moža faktyčna zapuścić praces «terafarmavańnia» Marsa, heta značyć, što ŭmovy žyćcia na Marsie nabliziacca da ziamnych.
Na Ziamli mikraarhanizmy majuć vyrašalnaje značeńnie dla mnohich pracesaŭ, jakija padtrymlivajuć žyćcio, takich jak raskładańnie i stravavańnie. U artykule śćviardžajecca, što najlepšymi mikrobami dla hetaha mohuć być ekstremafiły — arhanizmy, jakija mohuć žyć navat u samym ekstremalnym asiarodździ.
