«Kresovaja moładź» zaklikaje zapisvacca na pierapisie palakami. Apieluje da Kalinoŭskaha i Kaściuški
Na hetym tydni ŭ horadzie Masty Hrodzienskaj vobłaści stali raspaŭsiudžvać ŭlotki z zaklikam zapisvacca pry pierapisie nasielnictva palakami. Nalepki źjavilisia na infarmacyjnych tumbach, na prypynkach hramadskaha transpartu.
Najbolš aryhinalnymi vyhladali nalepki ŭ formie karty palaka, na jakich adlustravanyja Kastuś Kalinoŭski, Tadevuš Kaściuška i Adam Mickievič. Mabyć, heta pavinna dać prykład: usie jany byli palakami — budź jak jany.
Čakajecca, što padobnaja infarmacyja budzie raspaŭsiudžvacca i pa inšych haradach Zachodniaj Biełarusi. Za akcyjaj staić arhanizacyja «Fundacyja moładzi kresovaj». Mirasłaŭ Kapcevič ź Lidy, adzin ź jaje lidaraŭ, adkazaŭ na pytańni «NN».
«Naša Niva»: Čamu vy pačali takuju akcyju?
Mirasłaŭ Kapcevič: Jak my napisali ŭ našym zvarocie da žycharoŭ Zachodniaj Biełarusi: kolkaść palakaŭ u Biełarusi pastajanna skaračajecca. Stałyja ludzi pamirajuć, pracazdolnyja vyjazdžajuć na zarobki, a moładź, na žal, zabyvaje pra svaje karani.
Naša akcyja choča nahadać ludziam z polskimi karaniami, u pieršuju čarhu moładzi, pra toje, što situacyju my možam źmianić, kali buduć sumiesnyja aktyŭnyja dziejańni. Na dadzieny momant hetymi dziejańniami źjaŭlajecca toje, što padčas pierapisu nasielnictva kožny biełaruski palak moža zapisać u pierapisny list svaju nacyjanalnaść i rodnuju polskuju movu.
«NN»: Dziela čaho treba, kab bolej ludziej zapisałasia palakami?
MK: Bo heta maje palityčnaje značeńnie. Kali kolkaść palakaŭ budzie źmianšacca, ciažka budzie vieści i tak nie lohki dyjałoh z uładami Biełarusi ab adukacyi na polskaj movie ŭ haradach, dzie pražyvaje vialikaja kolkaść palakaŭ.
«NN»: Chto vas padtrymlivaje?
MK: Padtrymlivajuć nas u pieršuju čarhu studenty ź Biełarusi, jakija vyjechali na vučobu ŭ Polšču i ciapier biaruć udzieł u akcyjach našaha fondu. Padtrymlivajuć nas ludzi i na miescy — heta ŭ pieršuju čarhu moładź, źviazanaja ź inicyjatyvaj «Palaki Haradzienščyny».
«NN»: Vam nie zdajecca pieraboram malavać ulotki z Kalinoŭskim na karcie palaka?
MK: Chaču padkreślić, što my nie źjaŭlajemsia šavinistami ci nacyjanalistami. My pavažajem Biełaruś, biełaruskuju movu i kulturu, bo heta naša radzima.
Ale davajcie hladzieć praŭdzie ŭ vočy: Kalinoŭski, Kaściuška i Mickievič pisali i havaryli na polskaj movie, pryśviacili žyćcio baraćbie za polskuju dziaržavu… Čamu ž tady Kalinoŭski na karcie palaka — heta pravakacyja?
Jany naradzilisia na ziamli, na jakoj naradzilisia i my. Tamu my praviali anałohiju ź siońniašnim časam i zrabili takija nalepki.
«NN»: Čamu ŭ naźvie vašaha fondu jość słova «kresy»? Jano ž nabyło niehatyŭnuju afarboŭku?
MK: U zaležnaści ad taho, chto i jak usprymaje hetaje słova. Dla vielmi ŭražvalnych biełaruskich nacyjanalistaŭ jano moža nasić niehatyŭnuju afarboŭku. Miascovyja ž palaki vielmi časta jaho vykarystoŭvajuć, nazyvajuć siabie kresaviakami.
Naprykład, lidski chor adnoj z polskich arhanizacyj nazyvajecca «Kresoviacy». I navat miascovyja ŭłady časta zaprašajuć jaho na roznyja mierapryjemstvy.
