Pamiežny kamitet patłumačyŭ słovy Łukašenki pra «nahłucha zakrytyja» miežy z Ukrainaj
Pres-sakratar Dziaržaŭnaha pamiežnaha kamiteta Biełarusi Anton Byčkoŭski zajaviŭ, što ŭsie punkty propusku na miažy z Ukrainaj pracujuć u štatnym režymie. Pra heta paviedamlaje TASS.
«Hramadzianie mohuć svabodna pierasiakać miažu pa dakumientach, jakija dajuć prava na vyjezd za miažu. Miaža zakryta dla niezakonapasłuchmianych hramadzian i złačynnych elemientaŭ», — paviedamiŭ jon.
Pavodle jaho słoŭ, stanovišča na miažy całkam kantralujecca.
«My nadajom samuju pilnuju ŭvahu spynieńniu faktaŭ kantrabandy zbroi, bojeprypasaŭ i vybuchovych rečyvaŭ, niezakonnym pieramiaščeńni narkotykaŭ», — padkreśliŭ Byčkoŭski.
Taksama jon adznačyŭ, što DPK dziejničaje stroha ŭ adpaviednaści z daručeńniami Alaksandra Łukašenki.
Raniej 3 vieraśnia biełaruski kiraŭnik zajaviŭ, što kraina była vymušana «nahłucha zakryć» miažu z Ukrainaj. Pry hetym Łukašenka vykazaŭ škadavańnie, što takuju palityku daviałosia ŭvieści ŭ dačynieńni da «svaich bratoŭ, blizkich ludziej». «A siońnia sa svaimi ludźmi začynili miažu nahłucha. Čamu? Pajšoŭ patok zbroi», — patłumačyŭ jon.
Łukašenka taksama padkreśliŭ, što kali zbroja akazvajecca ŭ rasparadžeńni «ŭ zvyčajnych ludziej i asabliva nacyjanalistyčna nastrojenych, čakaj teraryzmu».