«Pryjezd Bołtana aznačaje, što situacyja vakoł «pahłyblenaj intehracyi» aceńvajecca amierykancami jak surjoznaja»
Džon Bołtan, daradca prezidenta ZŠA pa nacyjanalnaj biaśpiecy, pryjedzie ŭ Biełaruś. Kali vizit adbudziecca, jon stanie samym pradstaŭničym pryjezdam amierykancaŭ za 25 hadoŭ.
Bołtan maje reputacyju «jastraba», jaki ličyć, što zamiežnuju palityku treba pravodzić z pazicyi siły. U Biełaruś Bołtan pryjedzie praz Kijeŭ.
Što aznačaje hety vizit i čaho čakać ad jaho? «Naša Niva» raspytała analitykaŭ i dypłamataŭ.
«Heta pracoŭnaje ŭzajemadziejańnie, vielmi patrebnaje abiedźvium krainam, — tak aceńvaje hety vizit były načalnik adździeła ZŠA i Kanady Ministerstva zamiežnych spraŭ Biełarusi Ihar Hubarevič. — U toj ža čas taki vizit biełaruskim uładam ciažka pradavać jak pryznańnie», — kaža jon.
«ZŠA takaja kraina, što sam fakt sustrečy na najvyšejšym uzroŭni (ci navat uzroŭni ministraŭ zamiežnych spraŭ), a tam bolš vizit takich asobaŭ u Biełaruś — heta vielmi pazityŭny sihnał ad Amieryki, u peŭnym sensie zaachvočvańnie, premija», — dadaŭ Hubarevič.
«Heta pazityŭnaja padzieja, sihnał umacavańnia niezaležnaści i suvierennaści Biełarusi», — skazaŭ «Našaj Nivie» i dypłamat adnoj ź jeŭrapiejskich krain.
Hubarevič adznačaje, što Džon Bołtan — amierykanski čynoŭnik najvyšejšaha ranhu, jaki naviedaje Biełaruś paśla taho, jak u Minsku ŭ 1994 hodzie pabyvaŭ ź vizitam prezident ZŠA Bił Klintan.
«U papiarednija hady Alaksandr Łukašenka zadavolvaŭsia sustrečami z čynoŭnikami na ŭzroŭni načalnika adździeła Dziarždepartamienta.
Vizit Bołtana — unikalnaja mahčymaść abmierkavać pytańni biaśpieki ŭ našym rehijonie z čałaviekam, jaki ŭvachodzić u najbližejšaje atačeńnie Donalda Trampa. Chutkich i losavyznačalnych nastupstvaŭ hetaha vizitu čakać nie varta, ale sihnał u Maskvie pačujuć», — padsumavaŭ były biełaruski dypłamat.
«Treba razumieć «padzieł pracy» u amierykanskaj zamiežnaj palitycy, — patłumačyŭ «Našaj Nivie» adzin ź dziejnych supracoŭnikaŭ Ministerstva zamiežnych spraŭ. — U hetaj sistemie Pampiea, naprykład, zajmajecca sistemnym prasoŭvańniem amierykanskich intaresaŭ, a Bołtan vyrašaje kryzisnyja pytańni. Jaho praca abapirajecca na šyrokaje koła acenak: dypłamatyčnych, ekśpiertnych, raźviedki.
I pryjezd Bołtana ŭ Biełaruś aznačaje, što situacyja vakoł «pahłyblenaj intehracyi» aceńvajecca amierykancami jak surjoznaja, zdolnaja niezvarotna źmianić palityčny łandšaft Uschodniaj Jeŭropy. Tamu, zdajecca, asnoŭnaja meta vizitu — daviedacca pra budučyniu Biełarusi ŭ kantekście «pahłyblenaj intehracyi» niepasredna ad biełaruskaha kiraŭnictva, — skazała nam krynica ŭ MZS.
— A aproč abmienu dumkami adnosna Rasiei baki mohuć parazmaŭlać pra raźvićcio dvuchbakovych adnosin ź Biełaruśsiu, uzmacnieńnie amierykanskaj prysutnaści ŭ Polščy, pracesy va Ukrainie. Vielmi imavierna, što biełaruski bok za pieramoŭnym stałom budzie prasić pra niejki aficyjny krok, nakštałt vizitu Trampa.
U 90-ja hady Zachad admoviŭsia ad Biełarusi, i heta była vialikaja pamyłka», — kaža biełaruski dypłamat.
Biełaruski palitołah Dzianis Mieljancoŭ ličyć, što baki buduć havaryć pra strymlivańnie Rasii.
«Adnosiny z ZŠA ciaham niekalkich hod palapšajucca takimi marudnymi, ale niaŭchilnymi tempami. Chaj znakavych palityčnych vizitaŭ nie było, ale nibyta my adnavili dypłamatyčnyja adnosny i płanujem abmien ambasadarami.
Napeŭna, pryjšoŭ čas, kali niejkimi vizitami treba abmianiacca. Heta adzin z čyńnikaŭ, ja dumaju. Druhoje — Biełaruś stała bolš cikavaj ZŠA praz našaje staŭleńnie da kanflikta va Ukrainie i novaje hieapalityčnaje stanovišča krainy miž Rasijaj i jeŭrapiejskimi sajuźnikami Štataŭ.
Daktrynalna my ŭ stratehii pa Centralnaj i Uschodniaj Jeŭropie, ahučanaj Mitčełam: kraina, jakaja strymlivaje rasijski impieryjalizm. I cikavaść padvyšajecca», — kaža Dzianis Mieljancoŭ.
Jak by na taki vizit mahli adreahavać u Rasii?
«Rasijskija ŚMI adreahujuć niervova, padaduć heta jak pieraaryjentacyju na Zachad, ale rasijskamu MZSu jasna, što nijakaj pieraaryjentacyi nasamreč niama, u tym liku vajskova — my sajuźniki.
Dy i pradjaŭlać niama čaho, bo instytucyjna navat ciapier, pad sankcyjami, uzrovień kantaktaŭ Rasii i ZŠA bolš vysoki, čym u nas — jany sami rehularna sustrakajucca z amierykancami», — skazaŭ Dzianis Mieljancoŭ.
