Ukrainskich marakoŭ rychtujuć da adpraŭki na radzimu — rasijskija ŚMI
Da kanca žniŭnia Rasija i Ukraina mohuć abmianiacca zatrymanymi i asudžanymi asobami, paviedamlaje Kommiersant.
Rasija i Ukraina vyjšli na finalnuju stadyju ŭzhadnieńnia abmienu asobami, jakija ŭtrymlivajucca na terytoryi abiedźviuch krain, raspaviała krynica, blizkaja da hetych pieramoŭ.
Pavodle jaje słoŭ, śpisy dla abmienu zaraz udakładniajucca. Pry hetym, pavodle jaje danych, va Ukrainu mohuć viarnucca nie tolki zatrymanyja minułaj vosieńniu ŭ Kierčanskim pralivie ŭkrainskija maraki.
Adznačajecca, što ŭ akružeńni prezidenta Ukrainy Uładzimira Zialenskaha paviedamili, što damoŭlenaść pra abmien była dasiahnutaja paśla pieršaj telefonnaj razmovy prezidentaŭ Rasii i Ukrainy 11 lipienia.
Pa słovach krynicy, abmien adbudziecca da kanca žniŭnia. Krynica taksama raspaviała, što va Ukrainu dakładna viernucca maraki.
Taksama infarmacyju pra toje, što praces abmienu zapuščany, na ŭmovach ananimnaści paćvierdziŭ ukrainski dypłamat.
U toj ža čas, surazmoŭca vydańnia nie zmoh adkazać, ci razhladajecca pytańnie pieradačy Ukrainie režysiora Aleha Siancova, asudžanaha ŭ Rasii da 20 hadoŭ turmy pa abvinavačańni ŭ teraryźmie.
Jon taksama admoviŭsia adkazvać na pytańnie, kaho ŭ abmien na marakoŭ vydaść Rasii Ukraina, «kab nie naškodzić».
