Kazłoŭ suprać Statkieviča: z AHP sa skandałam vyklučyli kiraŭnika Hrodzienskaj filii
U pačatku žniŭnia Palitrada AHP pryniała rašeńnie vyklučyć sa svaich šerahaŭ Mikałaja Salanika, jaki ŭznačalvaŭ Hrodzienskuju abłasnuju strukturu partyi.
Adzin ź pierformansaŭ Mikałaja Salanika. Fota spring96.org.
Sprava ŭ tym, što 7 lipienia Salanik byŭ abrany hrodzienskim kiraŭnikom niezarehistravanaha Biełaruskaha nacyjanalnaha kanhresu, jaki ŭznačalvaje Mikałaj Statkievič.
Kiraŭnictvu AHP takoje sumiaščeńnie pasadaŭ nie spadabałasia. Jany pastavili pierad spadarom Salanikam vybar: albo z nami, albo z BNK. Partyjec abraŭ kaalicyju.
Vykanaŭca abaviazkaŭ kiraŭnika AHP Mikałaj Kazłoŭ kaža, što Salanik parušyŭ statut partyi. «Jon nie moža zajmać adnačasova kirujučuju pasadu ŭ inšaj arhanizacyi», — kaža Kazłoŭ.
Sam Salanik havoryć, što hetaje rašeńnie supiarečyć i statutu, i zdarovamu sensu. Maŭlaŭ, heta nie partyja, a kaalicyja. «Partyja pavinna supracoŭničać z usimi demakratyčnymi siłami, jakija stajać za pieramieny», — skazaŭ nam hrodzienski aktyvist.
Pa słovach Salanika, suprać jahonaha vyklučeńnia vystupali pradstaŭniki homielskaj i bresckaj abłasnych arhanizacyj. «Samych masavych», — udakładniaje mužčyna.
«Nie spadabałasia heta v.a. kiraŭnika partyi, — havoryć Salanik. — Kiraŭnikom jon nikoli i nie budzie. Chaj zrobiać chacia b stolki, kolki Hrodzienskaja abłasnaja arhanizacyja zrabiła. Ja viedaju, što ŭžo padaŭ zajavu ab vychadzie z AHP Anatol Myškievič, buduć jašče niekalki chłopcaŭ».
Mikałuju Salaniku 65 hadoŭ, jon rodam z Dubrovienskaha rajona Viciebskaj vobłaści. Pracavaŭ ahranomam u Hrodzienskim rajonie. Byŭ načalnikam upraŭleńnia sielskaj haspadarki Hrodzienskaha rajvykankama, dyrektaram ptuškafabryki, dyrektaram kałhasa. Ciapier piensijanier. Nieadnarazova zatrymlivaŭsia za svaju palityčnuju dziejnaść.