U vioscy Uździenskaha rajona apteka pracuje ŭsiaho piać hadzin na tydzień. I tak užo treci hod
U sacyjalnych sietkach źjaviŭsia hrafik pracy adnoj z aptek Uździenskaha rajona. U paniadziełak, aŭtorak, sieradu, piatnicu, subotu i niadzielu tam… vychodnyja. Adkryta tolki ŭ čaćvier z 10 da 15 hadzin.
Fota z supołki Ukantakcie «Tvoj Minsk».
Apteka heta znachodzicca ŭ vioscy Voziera. U miascovaj ambułatoryi tłumačać: taki hrafik pracy voś užo z 2017 hoda.
«Asnoŭnaja aptekarka syšła ŭ dekretny vodpusk. A heta z centralnaj rajonnaj apteki supracoŭnik pryjazdžaje», — raskazvajuć u vioscy.
A što, kali kamuści terminova spatrebiacca leki ad prastudy ci alerhii? U samim Voziery aptek bolš niama, u miascovaj ambułatoryi siropy ad kašlu i tabletki nie pradajuć. Bližejšyja aptečnyja kompleksy — na FAPach u vioskach Karalova (heta ŭ 3 km) i Dzieščanka (u 5 km).
Staršynia Aziorskaha sielsavieta Vasil Mardas kaža, što da jaho sa skarhami nakont pracy apteki viaskovyja žychary pakul nie źviartalisia.
«Ale ja čałaviek novy, litaralna dva miesiacy na pasadzie, treba razabracca», — prakamientavaŭ jon.