Pradprymalnik z Oršy vypuskaje pradukcyju sa śmiešnymi biełaruskimi nadpisami. Zirnicie
Da niadaŭniaha času žychara Oršy Ihara Kaźmierčaka viedali tolki jak hramadskaha aktyvista. Ciapier jon abraŭ novuju śfieru dziejnaści — zarehistravaŭsia pryvatnym pradprymalnikam, piša Biełaruskaje Radyjo Racyja. Razam z adnadumcami jon robić suvienirnuju pradukcyju i ŭžytkovyja rečy — majki, zaplečniki, torbački — ź biełaruskimi nadpisami. Pryčym jość niekalki rysaŭ, jakija vyłučajuć aršanskuju pradukcyju z padobnaha asartymientu.
Prykładam, heta papularyzacyja tvorčaści miascovych mastakoŭ, havoryć Ihar Kaźmierčak. — Bo, jak ni kruci, ludzi ŭ nas redka chodziać pa karcinnych halerejach, i jašče radziej nabyvajuć karciny. A heta daje mahčymaść mastakam pakazać, što jany tut jość uvohule. Druhaja zadača — heta papularyzacyja biełaruščyny praz humar.
Na majkach i kubkach, jakija robić Ihar Kaźmierčak, cikavyja nie tolki malunki, ale i nadpisy. Pryčym ich nie treba prydumlać admysłova: «Pra Dubroŭna ŭ nas ceły cykł. Heta «my z Dubroŭna, nam usio roŭna», «Dubroŭna i Lady — staličnyja harady», tam statuja Svabody ŭpisanaja ŭ hierb Dubroŭna… Hetyja frazy ŭsie etnahrafičnyja, hetak havorać miascovyja. A my ich padchoplivajem, pa-mastacku azdablajem i viartajem u rodnyja miaściny, užo dla prodažu».
Ihar Kaźmierčak maryć, što majki i kubki z daścipnymi nadpisami nieŭzabavie buduć u kožnaha ziemlaka. Ceny pradprymalnik imkniecca trymać demakratyčnyja z ulikam nievysokich zarobkaŭ patencyjnych pakupnikoŭ.