Va Uruččy dziaŭčyna rychtavałasia da suicydu ŭ žyvym efiry. Ale milicyjant paśpieŭ dabiehčy da bałkona
Dziaŭčyna vyrašyła skončyć žyćcio samahubstvam, pra što raspaviała ŭ žyvym efiry svajho videabłohu ŭ sacyjalnaj sietcy. Jak dalej raźvivalisia padziei, ahienctvu «Minsk-naviny» raspaviali ŭ Pieršamajskim RUUS.
— U milicyju patelefanavała dziaŭčyna, jakaja paviedamiła, što jaje siabroŭka źbirajecca ździejśnić suicyd. Pra heta zajaŭnica daviedałasia z sacsietki, dzie ŭ žyvym videaefiry, razmaŭlajučy z padpisantami, taja padzialiłasia svaimi namierami. Apieratyŭny dziažurny nieadkładna adpraviŭ da miesca raźvićcia padziej milicejski narad, — raspaviała aficyjny pradstaŭnik Pieršamajskaha RUUS Kaciaryna Dabravolskaja.
Usio adbyvałasia na ahulnym bałkonie 19-ha paviercha žyłoha doma na vuł. Rusijanava. Pa darozie tudy opierupaŭnavažany adździeła kryminalnaha vyšuku Pieršamajskaha RUUS Dźmitryj Hutnik znajšoŭ staronku školnicy ŭ sacsietcy i pačaŭ ź joj razmaŭlać, uhavorvaŭ nie ździajśniać taki durny ŭčynak, imknučysia adciahnuć momant, kali jana pieralezie cieraz aharodžu haŭbca.
Milicejski ekipaž byŭ na miescy zdareńnia ŭ ličanyja chviliny. D. Hutnik chutka padniaŭsia na ahulny bałkon šmatpaviarchovika, dzie znachodziłasia školnica, i adciahnuŭ jaje na biaśpiečnuju adlehłaść. Paśla źviazaŭsia ź jaje baćkami i asabista pieradaŭ im dačku, paprasiŭšy źviarnuć asablivuju ŭvahu na jaje psichałahičny stan.
Dziaŭčyna tak i nie zmahła patłumačyć svajo rašeńnie — tolki paŭtarała, što tak budzie lepš dla ŭsich. Taksama viadoma, što jana nie pražyvała ŭ tym šmatpaviarchoviku na vuł. Rusijanava.
Baćki školnicy byli vielmi ŭdziačnyja milicyjantu za vyratavańnie ich dački.