Ва Уруччы дзяўчына рыхтавалася да суіцыду ў жывым эфіры. Але міліцыянт паспеў дабегчы да балкона
Дзяўчына вырашыла скончыць жыццё самагубствам, пра што распавяла ў жывым эфіры свайго відэаблогу ў сацыяльнай сетцы. Як далей развіваліся падзеі, агенцтву «Мінск-навіны» распавялі ў Першамайскім РУУС.
— У міліцыю патэлефанавала дзяўчына, якая паведаміла, што яе сяброўка збіраецца здзейсніць суіцыд. Пра гэта заяўніца даведалася з сацсеткі, дзе ў жывым відэаэфіры, размаўляючы з падпісантамі, тая падзялілася сваімі намерамі. Аператыўны дзяжурны неадкладна адправіў да месца развіцця падзей міліцэйскі нарад, — распавяла афіцыйны прадстаўнік Першамайскага РУУС Кацярына Дабравольская.
Усё адбывалася на агульным балконе 19-га паверха жылога дома на вул. Русіянава. Па дарозе туды оперупаўнаважаны аддзела крымінальнага вышуку Першамайскага РУУС Дзмітрый Гутнік знайшоў старонку школьніцы ў сацсетцы і пачаў з ёй размаўляць, угаворваў не здзяйсняць такі дурны ўчынак, імкнучыся адцягнуць момант, калі яна пералезе цераз агароджу гаўбца.
Міліцэйскі экіпаж быў на месцы здарэння ў лічаныя хвіліны. Д. Гутнік хутка падняўся на агульны балкон шматпавярховіка, дзе знаходзілася школьніца, і адцягнуў яе на бяспечную адлегласць. Пасля звязаўся з яе бацькамі і асабіста перадаў ім дачку, папрасіўшы звярнуць асаблівую ўвагу на яе псіхалагічны стан.
Дзяўчына так і не змагла патлумачыць сваё рашэнне — толькі паўтарала, што так будзе лепш для ўсіх. Таксама вядома, што яна не пражывала ў тым шматпавярховіку на вул. Русіянава.
Бацькі школьніцы былі вельмі ўдзячныя міліцыянту за выратаванне іх дачкі.
