Jakija banki pavialičyli prybytki, a jakija — źnizili
U pieršaj pałovie 2019 h. prybytak naraścili 14 kamiercyjnych bankaŭ, a źnizili 10 bankaŭ i Bank raźvićcia. Nivodny ź dziejučych bankaŭ nie byŭ stratnym. Infahrafika telehram-kanała Ekanomika.
Za 6 miesiacaŭ 2019 h. ahulny prybytak 24 kamiercyjnych bankaŭ i Banka raźvićcia skłaŭ 654,5 młn rub (+6,5% da 2018 h.). Infahrafika telehram-kanała Ekanomika.
Na fonie vykazanych Nacbankam aściaroh adnosna finansavaha stanu biełaruskich bankaŭ, na jakija cisnuć drennyja daŭhi, asablivuju ŭvahu vyklikajuć apublikavanyja rehulataram buchhałtarskija bałansy bankaŭ.
Pa vynikach pieršaha paŭhodździa 24 biełaruskija banki pavialičyli čysty prybytak na 11% u paraŭnańni z anałahičnym pieryjadam minułaha hoda da 548,3 młn rubloŭ, piša tut.by.
10 bankaŭ u pieršym paŭhodździ nie daciahnuli da vyniku minułaha hoda. Siarod ich pałova — banki ź pieršaj dziasiatki pa abjomie aktyvaŭ. Straty pry hetym nie pakazaŭ nichto.
Najbujniejšy pa pamiery aktyvaŭ bank krainy Biełarusbank zarabiŭ 178,1 młn rubloŭ (pryrost na 26,3%). Druhoje miesca pa čystym prybytku ŭ siomaha pa pamiery aktyvaŭ Pryjorbanka, jaki ŭvachodzić u aŭstryjskuju bankaŭskuju hrupu Raiffeisen. Čysty prybytak Pryjorbanka ŭ pieršym paŭhodździ vyras na 7,6%, da 75,2 młn rubloŭ. Trecim staŭ BPS-Śbierbank, jaki viarnuŭsia ŭ lik lidaraŭ paśla doŭhich razborak ź vielmi prablemnymi aktyvami. Prybytak banka vyras na 18,6%, da 68,3 młn rubloŭ.
Zamknuli piaciorku Alfa-Bank i Biełahraprambank.
Źnižeńnie prybytku pakazali ŭ pieršym paŭhodździ Biełhazprambank, Bielinviestbank (źnižeńnie było minimalnym — doli pracenta), Bank VTB «Biełaruś», Bank BiełVEB i Bank Dabrabyt.
Nahadajem, pavodle Nacbanka, dola nieabsłuhoŭvanych aktyvaŭ bankaŭ u aktyvach, schilnych da kredytnaj ryzyki, ad 1 maja 2018 hoda pavialičyłasia amal u 1,7 razy: z 3,5% da 5,8% na 1 lipienia 2019 hoda. Abjom nieabsłuhoŭvanych aktyvaŭ dasiahnuŭ 3,2 miljarda rubloŭ, pavialičyŭšysia na 83,6%.
Taki rost abumoŭleny pavieličeńniem restrukturyzavanaj zapazyčanaści, jakaja ŭvachodzić u skład nieabsłuhoŭvanych aktyvaŭ. Značnyja aściarohi rehulatara vyklikaje i rost bieznadziejnaj zapazyčanaści, uličvanaj na pazabałansavych rachunkach. Jaje abjom skłaŭ 3,4 młrd rubloŭ.
Parohavym pakazčykam prablemnych aktyvaŭ ličać 10%.
Peŭnuju aściarohu ŭ Nacbanka vyklikaje taksama rost doli valutnaha składnika ŭ nieabsłuhoŭvanych aktyvach. Na 1 lipienia dola nieabsłuhoŭvanych aktyvaŭ u rublach skłała 3,8%, u zamiežnaj valucie — praktyčna ŭ dva razy bolš: 7,6%.
Situacyja ź nieabsłuhoŭvanymi aktyvami charaktaryzujecca kancentracyjaj asnoŭnaha abjomu nieabsłuhoŭvanych aktyvaŭ u bankach ź pieravažnaj dolaj dziaržaŭnaj ułasnaści, adznačaje rehulatar. Heta źviazana z tym, što istotnaje pavieličeńnie abjomu nieabsłuhoŭvajemych aktyvaŭ adbyłosia za košt restrukturyzacyi kredytnaj zapazyčanaści bujnych pazyčalnikaŭ — jurydyčnych asob dziaržaŭnaj formy ŭłasnaści.
Pavodle Nacbanka, 59,7% nieabsłuhoŭvanych aktyvaŭ bankaŭ, daŭžnikami pa jakich źjaŭlajucca jurydyčnyja asoby, sfarmavanyja zapazyčanaściu jurydyčnych asob dziaržaŭnaj formy ŭłasnaści.
