Jak siamja Jarmolenkaŭ stała cieniavymi miedyjamahnatami ŭ Biełarusi
Historyjaj pra toje, jak śpiavačka Alesia razam ź siabram Łukašenki praz afilavanuju jurasobu zahłušyła amal uvieś rynak tele- i radyjorekłamy ŭ Biełarusi, dzielicca partał rasśledavańniaŭ belsled.org.
Jak vyśvietliłasia niekalki hadoŭ tamu, adzin z samych šykoŭnych katedžaŭ u elitnaj vioscy Vieśninka (heta «Drazdy-2») pabudavaŭ sam… Anatol Jarmolenka. Kaniečnie, narodny artyst Biełarusi viadomy na ŭsioj postsavieckaj prastory i zaŭsiody siabravaŭ z uładaj: u 2006 hodzie jaho ansambl «Siabry» vykanaŭ bieśśmiarotny chit «Słuchaj baćku!», a zaraz Anatol Jarmolenka apraŭdvaje pryzyŭ u armiju mahistrantaŭ i aśpirantaŭ. Ale ŭsio ž, ci možna adnymi turami zarabić na asabniak, kruciejšy, čym u najvyšejšych čynoŭnikaŭ i miascovych aliharchaŭ?
Anatol Jarmolenka i ansambl «Siabry»
Samy papularny moładzievy telekanał u Biełarusi — TNT-International, naležyć TAA Trio Media, uładalnikam jakoha z 2015 hoda źjaŭlajecca jašče adzin žychar Viaśninki, asabisty siabar Alaksandra Łukašenki Siarhiej Ciacieryn, a taksama dačka Anatola Jarmolenki Volha Miniec, bolš viadomaja jak śpiavačka Alesia. Moža, «kudzieśnica lesu» raptam stała paśpiachovaj biznesoŭkaj i, biezumoŭna, dapamahła baćku ŭ budaŭnictvie katedža-amfiteatra. Darečy, mienavita jana ŭ 2018 hodzie aficyjna nabyła asabniak śpievaka za simvaličnuju płatu 50 tysiač dalaraŭ.
Za apošnija niekalki hadoŭ Volha Miniec razam ź Siarhiejem Ciacierynym praz afilavanyja jurydyčnyja asoby padmiali pad siabie amal uvieś rynak tele- i radyjorekłamy, tym samym staŭšy cieniavymi miedyjamahnatami Biełarusi.
Pierš čym praciahnuć, nieabchodna zrabić liryčnaje adstupleńnie i ścisła raspavieści pra toje, jak uładkavany rekłamny rynak u miedyjaśfiery Biełarusi.
Jak viadoma, hałoŭny prybytkovy artykuł luboha miedyja — heta prodaž rekłamy. Z raźvićciom miedyjarynku bujnym ŚMI stała bolš vyhadna nie ŭtrymlivać ułasnuju rekłamnuju słužbu, a daručyć hetuju dziejnaść samastojnym firmam-pasiarednikam, jakija nazyvajucca miedyjasielerami. U zadačy sieleraŭ uvachodzić prodaž rekłamnych mahčymaściaŭ ŚMI rekłamadaŭcam i rekłamnym ahienctvam.
Naturalna, samyja prybytkovyja sielery pracujuć sa ŚMI z samaj darahoj rekłamaj — heta značyć, z telekanałami. Ale kab pravilna kupić abo pradać rekłamu, nieabchodna vałodać dakładnaj infarmacyjaj ab rejtynhach telekanała ŭ rozny čas viaščańnia, a taksama ab jakasnych charaktarystykach jaho aŭdytoryi. Usia hetaja infarmacyja zamiarajecca admysłovymi firmami-vymiaralnikami.
U Biełarusi isnujuć dva televizijnyja sielery. Najstarejšym ź ich źjaŭlajecca firma «ViAjBieł» (VIBel), stvoranaja ŭ dalokim 1999 hodzie. Ciapier jana zajmajecca prodažam rekłamy na takich telekanałach, jak ANT, STB, RTR-Biełaruś, TV3-Bieł, BiełMuzTV. Z 2019 hoda jana taksama absłuhoŭvaje značny siehmient radyjorynku: «Humar FM», «Ruskaje radyjo», «Roks», Miełodyi vieka» i inšyja.
Druhi televizijny sieler pryjšoŭ na biełaruski rynak z 2014 hoda paśla taho, jak Biełteleradyjokampanija praviała adpaviedny tendar i zaklučyła kantrakt ź firmaj «Alkasar Miedyja Servis». Abiedźvie firmy pieršapačatkova źjaŭlalisia adhalinavańniami adnajmiennych prestyžnych rasijskich kampanij.
Adnak, jak vynikaje ź infarmacyi rehistra jurydyčnych asob, 31 śniežnia 2015 hoda «ViAjBieł» na 99% adyšoŭ firmie TAA «FłumienInviest», jakaja na 50% naležyć viadomaj firmie Siarhieja Ciacieryna «BiełHłobałStart».
Ułaśniki sieleraŭ «ViAjBieł»
Ułaśniki TAA «Fłumieninviest»
Što tyčycca «Alkasar Miedyja Servis», to ŭsiaho praz paŭtara miesiaca paśla zaklučeńnia kantrakta z BT jon byŭ całkam pieraaformleny na kiprskuju firmu «Rusat Satełajt Limited». Daznacca pra jaje ŭłaśnikaŭ ciažka, ale pa ŭskosnych prykmietach možna vyznačyć, z kim jana źviazanaja.
Pry ŭvažlivym razhladzie vypiski z rehistra jurydyčnych asob vyśviatlajecca, što jurydyčny adras, je-mejł i kantaktny telefon «Alkasar Miedyja Servis» całkam supadajuć z vyšejzhadanaj firmaj Siarhieja Ciacieryna i Volhi Miniec TAA «Trya Miedyja».
Ciapier nakont vymiareńnia rejtynhaŭ telekanałaŭ i radyjostancyj. Hety rynak u Jeŭropie (za redkim vyklučeńniem) padzieleny pamiž tryma prafiesijnymi mižnarodnymi karparacyjami, adna ź jakich navat vyjhrała ŭ Biełarusi adpaviedny konkurs u 2011 hodzie.
Ale ŭ našaj krainie sacyjałohija — sprava dziaržaŭnaj važnaści, tamu daśledavańniem aŭdytoryi ŭsich telekanałaŭ i radyjostancyj zaraz zajmajecca PUP «Realnaje vymiareńnie», dyrektaram jakoha źjaŭlajecca były zahadčyk siektara sacyjałohii ŚMI i IT Instytuta sacyjałohii NAN Biełarusi Vital Student, a ŭłaśnikam, padobna, — jaho baćka Siarhiej Student.
U 2018 hodzie na hetym rynku źjaviŭsia pasiarednik — adziny zamoŭca vymiareńniaŭ aŭdytoryi telebačańnia i radyjo, jaki apłaciŭ praviadzieńnie daśledavańniaŭ na niekalki hadoŭ napierad i zaraz pradaje dostup da bazy dadzienych usim rekłamnym ahienctvam i rekłamadaŭcam.
Hetym adzinym zamoŭcam stała firma «AMH-Kansałt», 90% jakoj aformlena na kiprskuju firmu «Abryma Enterprajzis Limited». Nie treba leźci ŭ kiprskija rejestry, kab vyjavić, što ŭ «AMH-Kansałt» usio toj ža je-mejł, što i ŭ «Trya Miedyja», a zarehistravany jon na ŭsio toj ža kantaktny telefon, jaki naležyć dyrektaru «AMH-Kansałt» Viktoryi Saŭčyc (Mieržva), jakaja raniej pracavała na telekanale BiełMuzTB.
Kantaktnaja infarmacyja z rehistra jurydyčnych asob
I heta jašče nie ŭsio. Akramia telebačańnia i radyjo, dosyć prybytkovym źjaŭlajecca i rynak internet-rekłamy. U biełaruskim siehmiencie internetu dziejničajuć try vialikija selery: WebExpert, Admixer i ENTER NET AV.
Apošni — samy małady z troch, zarehistravany ŭ 2016 hodzie. Za karotki čas firmie ŭdałosia zaniać važnaje stanovišča na rynku. U ciapierašni čas EnterNetAV pradaje biełaruskaj aŭdytoryi baniernuju i mabilnuju rekłamu na kučy biełaruskich i rasijskich sajtaŭ — ad kyky.org da Lenta.ru, handluje videarekłamaj na papularnych videaservisach nakštałt Megogo abo Rutube, a taksama źjaŭlajecca ekskluziŭnym partnioram Jandeksa ŭ Biełarusi pa prodažy rekłamy na hałoŭnaj staroncy.
Dyk voś, 80% firmy «EnterNetAV» naležyć… usio toj ža Volzie Miniec.
Darečy, pra BiełMuzTV. 10% telekanała taksama naležyć Volzie Miniec, astatnija 90% — firmie-suzasnavalniku «Trya Miedyja», TAA «AMH-Infarm», za jakoj znachodzim usio tuju ž kiprskuju firmu «Abryma Enterprajzis Limited».
U svaju čarhu, firmie «Trya Miedyja», akramia TNT-International, z 2017 hoda naležyć jašče i 50% kampanii TAA «Dabrabačańnie», jakaja źjaŭlajecca pravaŭładalnicaj telekanała VTV. Sietka viaščańnia hetaha kanała ŭ asnoŭnym składajecca z praduktu rasijskaha STS, tamu niadziŭna, što jon uvachodzić u dziasiatku samych papularnych kanałaŭ Biełarusi, a siarod aŭdytoryi va ŭzroście da 44 hadoŭ zajmaje siomaje miesca.
Naprykancy niekalki słoŭ pra jašče adnaho čałavieka, jaki, treba mierkavać, i źjaŭlajecca trecim u tym samym «trya». U minułym rasśledavańni my mimachodam zhadali muža Volhi Anatoljeŭny, za jakoha jana vyjšła zamuž u 2011 hodzie. Heta Leanid Iharavič Miniec, jaki z 2007 pa 2011 hod byŭ adnym z ułaśnikaŭ telekanała BiełMuzTB.
Alesia i Leanid Miniec.
Pakolki ŚMI nazyvali jaho ŭładalnikam kanała BiełMuzTB jašče ŭ 2016 hodzie, a sam jon pieravažna pražyvaje na Kipry, ryzykniom vykazać zdahadku, što mienavita jon źjaŭlajecca kančatkovym bienieficyjaram i TAA «AMH-Infarm» i ŭsich kiprskich firmaŭ našaha rasśledavańnia.
Dumajem, nikomu nie treba tłumačyć, jak fihurantam našaha rasśledavańnia ŭdałosia damahčysia takich niejmaviernych pośpiechaŭ u biznesie. Ź Siarhiejem Ciacierynym usio jasna: hulaŭ u tenis z Łukašenkam, kasiŭ ź im travu i źbiraŭ kavuny, tamu ciapier dla jaho ŭsie darohi adkryty. Śpiavačka Alesia taksama nie apošni čałaviek u našaj krainie. A voś jaje muž… Pa paviedamleńniach ŚMI, Leanid Miniec da šlubu mieŭ niejki biznes u Aŭstryi. Moža, jon sapraŭdy prosta paśpiachovy pradprymalnik? Moža, i tak.
Voś tolki pry sprobach znajści choć niejkuju infarmacyju pra jaho pośpiechi ŭ krainach Jeŭropy, možna natrapić tolki na paru navin pra niejkaha hramadzianina Biełarusi pa imieni Leanid Miniets, jakoha ŭ 2009 hodzie sud Łatvii pryznaŭ vinavatym u machlarstvie i prysudziŭ da štrafu, a praz 3 hady — jašče i da kampiensacyi škody dziaržavie ŭ pamiery amal 1,7 miljona dalaraŭ.
