Rasijski teleprapahandyst Sałaŭjoŭ, u jakoha znajšoŭsia italjanski dazvoł na žycharstva, pačaŭ spračacca z Navalnym u tvitary
Rasijski teleprapahandyst Uładzimir Sałaŭjoŭ i apazicyjanier Alaksiej Navalny abmianialisia abvinavačvańniami i abrazami paśla publikacyi italjanskaha dazvołu na žycharstva, jaki maje Sałaŭjoŭ i jaho dzieci.
Čytajcie taksama: U rasijskaha teleprapahandysta Uładzimira Sałaŭjova znajšli dazvoł na žycharstva ŭ Italii
Paśla źjaŭleńnia fatahrafii dakumienta Sałaŭjoŭ spytaŭ u błohiera, chto pieraličyŭ jamu bitkoiny za publikacyju. Navalny adkazaŭ, što «tysiačy ludziej adpraŭlajuć achviaravańni ŭ FBK za pracu pa pošuku jaho vił u Italii, kuplenych na skradzienyja hrošy».
Viadučy nazvaŭ Navalnaha ašukancam i paprasiŭ raskazać, što jon «tvaryŭ» u byłoha hubiernatara Kiraŭskaj vobłaści Mikity Białych, a taksama i «sotku», jakuju «Maša pavinna pieradać». Chutčej za ŭsio, Sałaŭjoŭ mieŭ na ŭvazie Maryju Hajdar, jakaja ŭ 2009-2011 hadach pracavała namieśnikam staršyni ŭrada Kiraŭskaj vobłaści.
«Chaču ŭziać urok u vas, sińjor: skažycie, u vas i vašaj siamji jość dazvoł na žycharstva ŭ Italii, krainie, jakaja ŭviała sankcyi suprać Rasii? Navošta jon vam?» — praciahnuŭ Navalny. Sałaŭjoŭ adkazaŭ na hetaje pytańnie ranicaj 23 lipienia. «Patrebny dla pajezdak. Status da mihrantaŭ dačynieńnia nie maje, tabie ž adpraŭlali spasyłki z tłumačeńniami», — napisaŭ jon. Paśla hetaha žurnalist paprasiŭ adkazać na jaho pytańni.
Jon taksama staŭ patrabavać ad Navalnaha raskazać, «jak ad vojska pa daviedcy kasiŭ». Navalny žartaŭliva zaŭvažyŭ, što hetaje pytańnie źviazana z tym, što sam Sałaŭjoŭ «nie prosta atrymaŭ dazvoł na žycharstva ŭ Italii, ale i zapisaŭsia ŭ bataljon NATA».
Paźniej błohier taksama pacikaviŭsia, adkul viadučy 23 lipienia vioŭ radyjoprahramu «Poŭny kantakt» na «Viesti FM». «Navat siońniašniuju prahramu viali ź Italii?» — pacikaviŭsia jon. Sałaŭjoŭ sapraŭdy vioŭ efir nie sa studyi, a vychodziŭ u efir pa telefonie. Jon paviedamiŭ, što «znachodzicca na adpačynku», jaki ŭ jaho «drobny pa pary dzion pamiž televizijnymi efirami».
Sałaŭjoŭ i Navalny trolili adzin adnaho na praciahu viečara 22 lipienia i praciahnuli pierapisku na nastupny dzień. Navalny pytaŭsia viadučaha, jaki ŭ svaich pieradačach łaje Zachad, «ci dobra zajmacca sportam na bierahach voziera Koma» i ci nie zaŭvažaje jon pablizu sałdat NATA. Sałaŭjoŭ paryravaŭ, što Navalny pravodzić za miažoj «bolš času», čym jon. «I nie adčajvajsia. Prabiažyš. Hałoŭnaje praciahvaj treniravacca. Jakija tvaje hady», — iranizavaŭ teleprapahandyst.
