Ukrainski deputat źmiaščaje dadzienyja ekzit-połaŭ u svaim kanale, niahledziačy na zabaronu
Ukrainskaje zakanadaŭstva zabaraniaje publikacyju źviestak ekzit-połaŭ da skančeńnia hałasavańnia. Adnak zakony va Ukrainie vykonvajuć nie ŭsie. U pryvatnaści, deputat-žurnalist Mustafa Najem u svaim kanale vykładvaje vyniki ekzit-połaŭ — ich va Ukrainie pravodziać adnačasova čatyry sacyjałahičnyja słužby. Varta adznačać, što ŭsie čatyry ahienctvy ź vialikaj dakładnaściu pradkazali vynik prezidenckich vybaraŭ uviesnu.
Sacyjałahičnyja apytańni pa stanie na paśla abiedu dajuć pradkazalnuju pieramohu prezidenckamu śpisu «Słuha naroda», ale jon nabiraje mienš, čym spadziavaŭsia. Pakul za śpis Zialenskaha hałasujuć ad 40 da 45 % vybarcaŭ. Moža być, hetaja ličba vyraście pad viečar, kali na ŭčastki pryjdzie mienš dyscyplinavany małady elektarat.
Z ranicy bolš aktyŭna hałasavała ŭschodniaja Ukraina, mlava — zachad i centr.
U parłamient taksama prachodziać prarasijskaja Apazicyjnaja płatforma za žyćcio z 12% hałasoŭ, a taksama partyja Piatra Parašenki «Jeŭrapiejskaja salidarnaść» z 9% i «Baćkaŭščyna» Julii Cimašenka z 8%.
Na miažy vybarčaha barjeru vahajecca partyja «Hołos» śpievaka Vakarčuka. Joj zastajecca spadziavacca, što haradskija «sovy», moładź uviečary dadaduć joj hałasoŭ.
Pry takim raskładzie ŭ vybarčym śpisie «Jeŭrapiejskaj salidarnaści» ŭ Radu prachodziać dva lidary krymskich tatar — naroda, jaki nie pryniaŭ anieksii Kryma Rasijaj i zachoŭvaje viernaść Ukrainie. Heta Mustafa Džemileŭ i Achtem Čyjhoz.
Ci atrymaje «Słuha naroda» absalutnuju bolšaść u Radzie, vyrašycca ŭ adnamandatnych akruhach, dzie ŭkraincy časta hałasujuć za jaskravuju ci bahatuju asobu, a nie za partyju.
«Słuha naroda» zajmaje centrysckija pazicyi na ŭkrainskaj palityčnaj scenie. Dźvie najbolš prajeŭrapiejskija i pranacyjanalnyja siły — heta «Jeŭrapiejskaja salidarnaść» i «Hołas».
