Čamu ŭsio ž mienavita Vałaam? Pucin prymie Łukašenku na svaim lubimym vostravie
Alaksandr Łukašenka nakiravaŭsia z rabočym vizitam u Rasiju. 18 lipienia ŭ Sankt-Pieciarburhu projdzie Forum rehijonaŭ Biełarusi i Rasii, a za dzień da hetaha kiraŭniki dziaržaŭ naviedajuć Vałaam.
Vałaam — heta vialikaja vyspa ŭ Ładažskim voziery. U pierakładzie z karelskaj movy «vałaam» značyć «hornaja miascovaść, uzvyšanaść». Kareły i finy byli tytulnym nasielnictvam hetaha rehijona ŭ raniejšyja časy. Viadomaść Vałaam nabyŭ dziakujučy mužčynskamu manastyru, jaki staić tut ad časoŭ Noŭharadskaj respubliki.
U Pucina z Vałaamam skłalisia vielmi daŭnija adnosiny. Jašče ŭ 2001 hodzie małady prezident u adzin ź pieršych adpačynkaŭ adpraviŭsia mienavita na Vałaam, a nie ŭ Sočy, jak rabiŭ da jaho Jelcyn. Jość fotka, dzie Pucin staić pobač ź jepiskapam Pankracijem (Žerdzievym).
Cikava, što Pankracija čas ad času nazyvajuć «duchoŭnikam Pucina», chacia na hety kont jość niekalki viersij. Pankracij nie curajecca adkryta vykazvacca pa aktualnych palityčnych pytańniach. Naprykład, litaralna z tydzień tamu Pankracij zaklikaŭ bajkatavać usio hruzinskaje. «Ni «Baržomi», ni «Basijani»! — skazaŭ jon paśla taho, jak Pucina abrazili na hruzinskim telebačańni «Rustavi-2».
Pucin pryjazdžaŭ na Vałaam u krasaviku 2014 hoda ŭ samy razhar kanfliktu na ŭschodzie Ukrainy. «Ja nie viedaju miesca bolš śviatoha za hetaje», — pieradavali jahonyja słovy na sajcie manastyra. Paŭdzielničaŭ prezident Rasii ŭ jakaści hościa i ŭ zapisie pieradačy «Vałaam» na rasijskim TB.
Darečy, ź vizitam Pucina na Vałaam u 2014 hodzie źviazvajuć i inšy siužet. Jość viersija (jaje ahučvali «Bi-bi-si», Radyjo «Svaboda» i inšyja ŚMI), što mienavita tady Pucin viančaŭsia z alimpijskaj čempijonkaj pa mastackaj himnastycy Alinaj Kabajevaj. Praŭda, paćvierdžańnia hetamu niama.
Rezidencyja Pucina na Vałaamie znachodzicca ŭ miežach Śviata-Uładzimirskaha skita. Jaho adkryli ŭ 2008 hodzie, a pabudavali ŭ rekordna karotki čas — ciaham dvuch hadoŭ. Aśviačać jaho pryjazdžaŭ Alaksiej II. Terytoryja skita zvyčajna zakrytaja dla naviednikaŭ, a pa pierymietry jaho staić achova. U narodzie toj skit časam nazyvajuć «Śviata-Pucinskim»: maŭlaŭ, i nazva była abranaja nie vypadkova.
Damok Pucina na Vałaamie. Fota meduza.io.
U Pucina tam jość haściavy domik, a taksama łaźnia. Tam ža znachodzicca vałaamskaja rezidencyja patryjarcha Kiryła.
Paśla taho, jak Vałaam zakaciravaŭ Pucin, tudy ž paciahnulisia i inšyja ŭpłyvovyja ludzi Rasii: palityki, biznesoŭcy, artysty. Mieć katedž na Ładažskim voziery, a mienavita na Vałaamie, źjaŭlajecca znakam vialikaj pašany. Z hetaj modaj bahatych ludziej na Vałaam źviazanaja inšaja niepryhožaja historyja: ludziej, jakija žyli na vostravie, amal što siłaj vysialali na maciaryk.
Što čakajecca ad pieramovaŭ Pucina i Łukašenki na Vałaamie? Kiraŭnik Biełarusi jašče na minułym tydni zaznačyŭ, što ničoha tajemnaha vyrašacca na Vałaamie nie budzie.
Napiaredadni pajezdki ministr ekanomiki Biełarusi Dźmitryj Kruty, jaki ŭznačalvaje pracoŭnuju hrupu pa intehracyi, skazaŭ, što abodva baki ŭzhadnili kancepcyju raźvićcia intehracyj krain. Dastatkova abciakalnaja fraz — i ciažka skazać, što jana moža značyć u realnaści.
Pasoł Biełarusi ŭ Rasii, vice-premjer Uładzimir Siamaška ŭ svaju čarhu skazaŭ, što naša kraina čakaje vyrašeńnia pytańnia kampiensacyi padatkovaha manieŭru, cenaŭtvareńnia na haz, a taksama prasoŭvańnia biełaruskaj miasa-małočnaj pradukcyi na rasijskim rynku.
Kamientary z rasijskaha boku adnosna hetaj sustrečy bolš ścipłyja. Tolki Valancina Matvijenka zaznačyła, što sajuznuju dziaržavu pryśpieŭ čas napoŭnić novym źmiestam. Taksama nie zusim zrazumieła, pra jaki źmiest jana kaža.
Napiareadni amierykanskaje vydańnie «Błumbierh» napisała, što Pucinu ŭsio ž nie ŭdałosia pierakanać Łukašenku ŭvajści ŭ skład Rasii.
U lubym vypadku, ciažka nazvać lohkimi pieramovy kiraŭnikoŭ krain na Vałaamie. I naŭrad ci tam jany buduć dumać tolki pra duchoŭnyja kaštoŭnaści i malitvy.
