U Viciebsku źbirali podpisy pad prašeńniem da Pucina
Napiaredadni aficyjnaha adkryćcia «Słavianskaha bazaru ŭ Viciebsku» prychilniki «russkoho mira» zładzili ŭ samym centry horada pikiet sa zboram podpisaŭ pad zvarotam da Uładzimira Pucina z prośbaj adnavić Saviecki Sajuz.
Pikiet prachodziŭ pad čatyrma ściahami — Biełarusi, Rasii, SSSR i ściaham z hieorhijeŭskimi pałosami, paviedamlaje vitebskspring.org. Žančyna, jakaja źbirała podpisy, nazvałasia hramadziankaj Rasijskaj Fiederacyi. Na jaje vopratcy byŭ pryšpileny značok ruchu «NOD» («Nacionalno-osvoboditielnoje dvižienije»).
«My, hramadzianie byłych respublik SSSR, vystupajem z patrabavańniem admieny niezakonnaha rašeńnia ab likvidacyi SSSR. Nieabchodna pastavić pytańnie ab viartańni da miežaŭ 1991 hoda, zamacavanych mižnarodnaj supolnaściu pa vynikach Druhoj suśvietnaj vajny», —- havorycca ŭ zvarocie na imia prezidenta Rasii Uładzimira Pucina.
«My patrabujem pravieści rasśledavańnie, što ž heta adbyłosia ŭ 1991 hodzie? Čamu našu Ajčynu tak lohka razvaliŭ Harbačoŭ i jaho pamahatyja? Dla taho, kab usio heta adbyłosia zakonna, pavinien byŭ prajści ŭsienarodny i ŭsiesajuzny refierendum. Kab kožnaja respublika zajaviła, što jana choča vyjści sa składu SSSR. A hetaha nie było», — patłumačyła sens inicyjatyvy žančyna.
Pikietoŭcy nie tolki źbirali podpisy, ale i razdavali minakam biaspłatnuju hazietu «Nacyjanalny kurs».
Da pikietoŭcaŭ padychodziŭ namieśnik staršyni Viciebskaha harvykankama Viktar Hłušyn. Ci papiaredžvaŭ jon ich ab niezakonnaści praviadzieńnia niesankcyjanavanaha masavaha mierapryjemstva ŭ centry horadu — nieviadoma, ale milicyja ludziej sa ściahami nie zatrymlivała.