Rekłama na kanale «Niechta» pravisieła 15 chvilin, pierad tym jak rekłamadaŭca «adumaŭsia» i paprasiŭ jaje źniać
Dziŭnaja situacyja adbyłasia z telehram-kanałam Niexta. Pra jaje «Našaj Nivie» paviedamiŭ jahony aŭtar, błohier Ściapan Śviatłoŭ.
Sprava ŭ tym, što bukmiekierskaja kantora «Parymatč» zamoviła ŭ kanale rekłamny post, ale pravisioŭ jon usiaho 15 chvilin, pierad tym jak niešta pajšło nie tak i biełaruski mieniedžar paprasiŭ Ściapana vydalić rekłamu.
«Ad samaha pačatku ja pryniaŭ rašeńnie bierahčy reputacyju kanała: ni za jakija hrošy nie publikavać rekłamu sumnieŭnych kantor nakštałt foreks-brokieraŭ, nielehalnych bukmiekieraŭ, «treninhaŭ asabistaha rostu», kryptavalutčykaŭ i inšych «łachatronaŭ», a taksama porna i pirackaha kantentu. Tak, ich šmat, i jany prapanujuć hihanckija sumy za dostup da 140-tysiačnaj biełaruskaj aŭdytoryi, ale reputacyja i davier čytačoŭ važniejšyja. A «Parymatč» — jakraz prystojnaja kantora z dobraj reputacyjaj i aficyjnaj rehistracyjaj, całkam adpaviadaje hetym patrabavańniam. Pieramovy ź biełaruskimi rekłamadaŭcami naohuł sprava składanaja, nadta ŭžo jany bajacca dziaržavy. Ale zdavałasia, što z «Parymatč» usio budzie praściej — usio ž mižnarodnaja bukmiekierskaja sietka. Spačatku tak i było — poŭnaje ŭzajemaparazumieńnie. Ale, jak vyśvietliłasia, zapanikavaŭ biełaruski filijał «Parymatč» — mieniedžar pa rekłamie napisała mnie, što byccam by z imi «nie ŭzhadnili raźmiaščeńnie». A potym jana dadała, što «my pazicyjanujem sabie jak absalutna apalityčnaja kampanija i imkniomsia nie raźmiaščacca ni ŭ praprezidenckich, ni ŭ apazicyjnych SMI», — raskazaŭ Ściapan.
Akazałasia, što rekłamu zamoviŭ i apłaciŭ ukrainski ofis bukmiekierskaj kantory.
I heta nie zrazumieŭ biełaruski bok.
«Parymatč Biełaruś» nie źjaŭlajecca zamoŭcam dadzienaha rekłamnaha paviedamleńnia. U vyniku manitorynhu my ŭbačyli hetuju publikacyju, i heta stała dla nas siurpryzam. My, jak pradstaŭniki brenda, byli vymušanyja źviarnucca da administratara z prośbaj vydalić publikacyi. Usie rekłamnyja prajekty, źviazanyja sa zhadkaj brenda na terytoryi Biełarusi, pavinny prachodzić tolki cieraz łakalny ofis i nie mohuć raźmiaščacca biez našaha ŭzhadnieńnia. U pryjarytecie dla raźmiaščeńnia spartyŭnyja resursy, telehram-kanał «Niechta» takim nie źjaŭlajecca», — patłumačyła «Našaj Nivie» pradstaŭnica «Parymatča» Chryścina Šabanava.
Varta dadać, što sam błohier schilny bačyć u hetym hulni KDB.
